1008
Ородой Холбоото Уласай Юрэнхылэгшэ Владимир Путинай хүтэлбэри доро Ехэ Кремлиин ордоной Георгиин зал соо үнгэргэгдэһэн юрэнхы ашаглалай автомашинын харгын сүлжээ хүгжөөхэ ба харгын хүдэлөөнэй аюулгүйе хангаха асуудалнуудта зорюулагдаһан Ородой Холбоото Уласай Гүрэнэй зүблэлэй суглаанда Буряад Уласай Толгойлогшо Алексей Цыденов элидхэл табяа.
- Автомашинын харгын сүлжээн хэр хүгжэнэб ба харгын хүдэлөөнэй аюулгүйн байдал хэр үрэ дүнтэй һайжаруулагданаб гэжэ бидэ мүнөөдэр шэнжэлжэ үзэхэбди. Энээхэн шэглэлээр гол зорилгонууд үндэһэн түсэлнүүдтэ тодорхойлогдоһон ... Харгын ажахыда ехэ хубилалтануудые туйлахын тула нютаг можонууд бүхэн һаяын сагта тунхаглаһан бэшэ, харин 2024 он болотор доошо бэшэ үедэ тоологдоһон үнэн бодото тусхай программануудые зохёожо, баталан абаха ёһотой. Тэрэнь харгы баригшадта «удаан хугасаада» ажалаа түсэблэхэ, үнтэй техникэ урид худалдан абаха, барилгын материалнуудые нөөсэлхэ, мэргэжэлтэдые бэлдэлгэдэ ба шэнэ технологидэ мүнгэ оруулха боломжо үгэхэ, - гэжэ ОХУ-гай Юрэнхылэгшэ суглаа нээхэдээ хэлээ.
Владимир Путин хүндэ ашаагай автомашинын ябаха дүрим сахилгын хойноһоо хиналта тогтоохо хэрэгтэй гэжэ хэлээ.
- Үшөө нэгэ шухала зорилго болбол хүндэ ашаагай машинын ябалга үрэ дүнтэй гуримшуулга хэлгэ болоно. Тэдэ машинануудта хараалагдаагүй харгыгаар ашаа зөөхэ нормо эбдэхэдээ, тэдэнэр ямар ехэ гарза хэнэ гээшэб. Һандарһан трассанууд дээрэ ДТП болонгүй аргагүй. Ашаагай машинануудай ябаха дүрим сахилгын хойноһоо хиналта хэрэгтэй, - гэжэ Владимир Путин хэлээ.
Өөрынгөө оролто үгэ хэлэһэнэй удаа ОХУ-гай Юрэнхылэгшэ Буряад Уласай Толгойлогшодо элидхэл хэхыень даалгаа.
- Бидэндэ мүнөө хэлсэхэ сэдэбүүд олон байна. Тэдэниие Госсоведэй ажалай бүлэг хэдэн һарын туршада ехэ нарин шэнжэлжэ гараа. Эгээл орёо, шухала асуудалнууд манай энэ зүблөөнэй урдахана ОХУ-гай албан зургаануудтай ба Засагай газартай зүбшэн хэлсэһэн байнабди. Ажалай бүлэгэй хүтэлбэрилэгшэ Алексей Самбуевич Цыденовые ажалай үрэ дүн тухайгаа элидхэхыень гуйнаб, - гэжэ Владимир Путин хэлээ.
Алексей Цыденовэй тэмдэглэһэнэй ёһоор, “Аюулгүй ба шанартай автомашинын харгынууд” гэһэн үндэһэн түсэлэй зорилгонуудые туйлахын тула ажалай бүлэг иимэ асуудалнуудые хаража үзөө гэбэл: нөөсөөр хангалга, тэрэ тоодо барилгын материалнууд, тэдэнэй бэлэн байлга, үнэ сэн, техникэ, хүнэй нөөсэ; хуули ёһоной асуудалнууд – ПСД ба ажалай бэшэг баримта зохёолго; түрүү технологи хэрэглэлгэ; захил хэгшын эрхэ мэдэл; Главгосэкспертизын ажал; үнэ сэнгэй сметэ бүрилдүүлгэ, тэрэ тоодо нютаг можын; газарай асуудалнууд; дайда дэбисхэр түсэблэлгэ; инженерэй холболтын зүрилдөө; ФЗ-44 хүреэндэ худалдан абалгын гурим; ажалай циклын хэрээ хэлсээнүүдые бэелүүлгэ болон бусад асуудалнууд.
Нютаг можонуудай ба нютагай харгынуудта хүүргэнүүдые хүгжөөхэ гүрэнэй программа байгуулха талаар түсэб – ОХУ-гай Госсоведэй дүнгэй эгээл шухалань болоно.
Алексей Цыденов нютаг можын ба нютагай харгынуудай хүүргэнүүдэй байдал тухай элидхээ. Ород гүрэндэ усалай гү, али усалда хүрэхэеэ байһан 3,5 мянга гаран хүүргэ ба хэмэл барилганууд тоологдоно. “Тээбэри” шэглэлээр ажалай бүлэг тэдэниие заһабарилха талаар тусхай программа баталхыень дурадхаа.
- Юрэнхы дээрээ бүхы асуудалнуудаар шиидхэбэри олдоо. Гол юумэн тухай дуулаабди: нютаг можын хүүргэнүүдтэ онсо анхарал хандуулагдаха. Бидэндэ хүүргэнүүд Хяагтада, Мухар-Шэбэртэ – бидэнэй һүүлшын хараһан хүүргэнүүд – заһабарида орохоор болоһон. Мүнөө нютаг можонуудай харгынуудта ба нютагуудай харгынуудта тусхай программа бии болохо. Бидэнэй хаража үзэһэн бүхы асуудалнууд – ехэ шухала юм. Шиидхэбэриин гарахада, ажалаа хэхэбди. Госсоведэй дүнгөөр олон юумэн нэмэлтэ хүгжэлтэ абаха, - гэжэ Буряад Уласай Толгойлогшо зүблөөнэй дүнгөөр сэтгүүлшэдтэ хэлээ.
Алексей Цыденовэй элидхэлэй һүүлээр Курска можын амбан захирагшын уялга саг зуура гүйсэдхэгшэ, “Тээбэри” гэһэн ажалай бүлэгэй хуби бүлэг ударидагша элидхэл хээ. Суг ажаллаһан хүнүүдэй хэлэһэнэй удаа тээбэриин сайд Евгений Дитрих «эндэ ороһон дурадхалнууд зүбшэн хэлсэгдэхэ” гээ.
