1099
Буряад Уласай Толгойлогшо Алексей Цыденов Оперо болон баледэй театрта багшанарай августын суглаа нээбэ. Буряад Уласай болон Улаан-Үдэ хотын болбосоролой һалбариин 600 хүдэлмэрилэгшэд жэл бүриин хэмжээ ябуулгада заншалта ёһоороо хабаадаа.
- Хүндэтэ нютагайхид, хүндэтэ багшанар, болбосоролой һалбариин бүхы ажалшад, таанараа энэ ехэ удха шанартай һайндэрөөр амаршалнаб! Таниие хани халуунаар амаршалаад, бүхы һайн һайханиие хүсэхэ дуран хүрэнэ. Мүнөө болбосоролой һалбарида ехэ анхарал хандуулнабди, һурагшад болон багшанар мүнөө үеын оршондо һуралсалаа, ажалаа ябуулха талаар ехэ ажал хэгдэнэ. 2021 он болотор улас дотор 12 һургуули баригдаха. Һургуули бүхэн сентябриин 1-дэ харюусалгатай бэлдэнэ. Байгша ондо 27 һургуулинуудта ехэ заһабарилга хэнэ, энэ хэрэгтэ 448,5 сая түхэриг һомологдоно. Манай уласта һургуулинуудай ехэ заһабарилгада ба шэнэ һургуулинуудые барилгада иимэ ехэ мүнгэн һомологдоогүй бшуу. Иимэ арга боломжо Алас Дурнын тойрогой тэдхэмжын хэмжээндэ болон Юрэнхылэгшын шиидхэбэреэр олгогдоо, - гэжэ уласай хүтэлбэрилэгшэ хэлэбэ.
Алас Дурнын тойрогто Буряад уласай оруулагдаһанай удаа дунда мэргэжэлэй болбосоролой эмхи зургаануудта зөөриин-оньһон хэрэгсэлнүүд шэнэлэгдээ гэжэ Алексей Цыденов тэмдэглээ. Юрэнхыдөө, 310 гаран сая түхэригтэ һуралсалай комбайнууд, тусхай тоног түхеэрэмжэнүүд түрүү ээлжээндэ шэнэлэгдээ. Үнгэрһэн жэлдэ Улаан-Үдэдэ Сибирь болон Алас Дурна тойрогто хүүгэдэй эгээл томо «Кванториум» гэһэн технопарк ашаглалгада тушаагдаа. Энэ жэл Буряад орон Буряадай гүрэнэй ехэ һургуулиин ба СИБГУТИ-н үндэһэн дээрэ эрдэмэй коллаборациин байрануудые байгуулха хоёр урилдаанда түрүүлээ. Уласай бюджедһээ мүнгэн һомологдожо, тэдэнэр дээдэ һургуулинуудта байгуулагдаха. Тиихэдээ һургуулиин хүүгэдэй улам гүнзэгыгөөр, зохёохы аргаар эрдэм шудалха юм.
- Үхибүүд нансашье улас дотороо бэшэ, харин гүрэн дотороо, дэлхэйдэ үрдилдэн тэмсэхэ аргатай байха талаар ажалаа гуримтайгаар ябуулнабди. Уласхоорондын мүрысөөнүүдтэ илалта туйлаһан тамиршад болон тэдэнэй һоригшодые шагнанабди, энээн шэнгеэр бүхэроссиин олимпиадада илаһан һурагшад болон тэдэнэй багшанарые мүн баһа шагнаха дурадхал оруулнаб, - гэжэ Алексей Цыденов мэдүүлээ.
Буряад Уласай Толгойлогшо мүн баһа ажалай салингай жасын талаар ябуулагдажа байһан ажал тухай хөөрэжэ үгөө. Тодорхойлбол, энэ жэл багшанарай коммунальна түлбэриин талаар салингай дунда зэргын тоосоонһоо гаргаха тухай шиидхэбэри абтаа.
- Мүнөө багшанарай салингай дунда зэргын хэмжээнһээ Буряад Улас гүрэн дотор 27-дохи һуурида байна. Ородой Холбоото Уласай 58 можо нютагта багшанар бидэнһээ бага салин абана. Тиигэбэшье иигээд тогтошохо бэшэбди, ажалаа үргэлжэлүүлхэбди, - гэжэ Буряад Уласай Толгойлогшо тэмдэглэбэ.
Буряад Уласай Засагай газарай мэдээсэлэй албанай гэрэл зураг
