387
Үндэһэн хуулида хубилалтанууд хуулиин эрилтэнүүдтэ таарана гү гэжэ Ородой Холбоото Уласай Конституционно сүүдтэ Юрэнхылэгшэ Владимир Путинай хандалгаар оробо. Үндэһэн хуулида дурадхаһан хубилалтанууд Гүрэнэй Дүүмэдэ, Федерациин зүблэлдэ, тэрэ тоодо, Буряад Уласай Арадай Хуралай ээлжээтэ бэшэ сессидэ, дэмжэгдэһэнэй удаа, үсэгэлдэр Ород гүрэнэй Юрэнхылэгшэ эдэ дурадхалнуудаар хуулида гараа табиба.
Конституционно сүүдэй шүүгшэд долоон үдэрэй туршада хубилалтанууд тухай шиидхэбэри абаха гэжэ Ородой Холбоото Уласай албан ёһоной сайтда хэлэгдэнэ. Шиидхэбэри абаха ажал публична бэшэ байха, юундэб гэхэдэ, хабаадагша таланууд үгы.
Дурадхагдаһан хубилалтанууд Үндэһэн хуулиин нэгэдэхи, хоёрдохи, юһэдэхи бүлэгүүдэй дүримүүдэй харша бэшэ гэжэ Конституционно сүүдэй шүүгшэдэй шиидхэбэри абабал, тэдэ апрелиин 22-то бүхэросиин һунгалтада табигдаха.
Ниигэмэй гүрэн гэһэн ойлгосо хубилалтануудай ашаар Үндэһэн хуулида тайлбарилагдана. Үндэһэн хуулида ажалай салингай доодо хэмжээн ажамидаралай доодо хэмжээнһээ байга байха ёһогүй, пенси болон ниигэмэй бусад тэдхэмжэ индексаци хэгдэхэ ёһотой. «Ородой Холбооото Уласта Эсэгэ ороноо хамгаалагшадайнгаа дурасхаал сахижа, түүхэтэ үйлэ хэрэгүүдые хамгаалдаг. Эсэгэ ороноо хамгаалһан арадай баатаршалга доошологдохо ёһогүй», - гэжэ хуулида хэлэгдэнэ. Ородой Холбоото Уласай үндэһэн хуулиин хэмжээндэ Советскэ Союзай эрхэ залгамжалагша гээд тоологдоно. Заншалта байдал аршалха талаар, гэрлэлгэ – эрэ эхэнэр хоёрой хоорондо байха ёһотой, харин үхибүүд Россин гүрэнэй бодолгын шухалань болоно.
Гүрэнэй Юрэнхылэгшын урдахи болзорыень үгыдэ тооложо, Юрэнхылэгшын тушаал хоёр болзорһоо дээшэ сагта тушаал эзэлхэ хорилто, гүрэн түрые хүтэлһэн хүнүүдтэ ойронь хүрэхэгүй гэһэн хубилалтанууд оруулагдана. Энээнһээ гадуур, Үндэһэн хуулида Гүрэнэй зүблэлэй үүргэ болон эрхэ батална, сайдуудые, албанай эмхинүүдэй хүтэлбэрилэгшэдые томилхо гурим һэлгэгдэхэ, Конституционно сүүдэй бүрин эрхэ үргэдхэгдэхэ.
2020 оной эхиндэ Федеральна Суглаанда жэл бүриин захил-хандалгадаа Владимир Путин Үндэһэн хуулида хубилалтануудые оруулха тухай дурадхал оруулаа гэжэ һануулнабди. Январиин һүүл багта Юрэнхылэгшэ Үндэһэн хуулида хубилалтануудые оруулха тухай хуулиин түсэл Гүрэнэй Дүүмэдэ оруулаа. Гүрэнэй Дүүмэдэ апрелиин 22-то һунгалта үнгэргэхэ гэһэн дурадхал дэмжэгдэжэ, энэ үдэр амаралтын үдэр гэжэ соносхогдохо.
