277
Ородой Холбоото Уласай Юрэнхылэгшээ Владимир Путин Үндэһэн хуулида эрхэтэдтэ эмнэлгын туһа һаадгүй хүргэгдэхэ тухай дурадхал дэмжэбэ, энэ туһа нютагай засаг зургаан хангаха ёһотой.
Гүрэнэй шухала хуулида оруулагдаха нэмэлтэнүүдые бэлдэхэ ажалай бүлэгтэй уулзалгада элүүрые хамгаалгын һалбариин хүтэлбэри гуримшуулха тухай Үндэһэн эмнэлгын танхимай хүтэлбэрилэгшэ, хүүгэдтэ хируургиин болон травматологиин дары туһа хүргэхэ эрдэмэй-шэнжэлэлгын дарга Леонид Рошаль дурадхаба.
- Үндэһэн хуулида оруулагдаха хубилалтануудтай хамта элүүрые хамгаалгын һалбарида мүнгэ һомололго дээшэлүүлэгдэжэ, танай хэлэһэнэй ёһоор, эмшэдээр хангаха, зөөриин болон техническэ бааза шэнэлхэ, түрүүшын звенодо хубилдалта – эдэ бүгэдын ашаар, һаяын сагта Ород гүрэнэй ажаһуугшад элүүрые хамгаалгын һалбари һайжаруулагдаһаниинь ойлгохо, - гэжэ Леонид Рошаль хэлэбэ.
Тэрэ Ородой Холбоото Уласай Засагай газарай мэдэлдэ эмнэлгын туһа хүргэлгын эмхидхэлэй хуулиин нэгэ үндэһэ оруулха, Ородой Холбоото Уласай можо нютагуудай мэдэлдэ элүүрые хамгаалгын һалбариин асуудалнуудые залан хүтэлбэри оруулха (элүүр энхэ ажаһууха талаар оршон байгуулха, һайн шанартай эмнэлгын туһа хүргэхэ), нютагай өөһэдын хүтэлбэринүүдтэ эмнэлгын туһа һаадгүй хүргэхэ оршон байгуулга даалгаха.
- Эрхэтэн бүхэндэ тон шухала асуудал тухай хэлэбэт. Минии һанахада, манай гүрэндэ иимэ юумэн байгаагүй, - гэжэ Владимир Путин хэлэбэ.
Ородой Холбоото Уласай Юрэнхылэгшэ хубилалтануудай ашаар нютагай өөһэдын хүтэлбэриин болон гүрэнэй хүтэлбэриин хоорондохи таһалдаан үгы болохо гэжэ найданаб гэжэ мэдүүлээ.
- Засаг зургаанай доодо һалаа, нютагай өөһэдын хүтэлбэринүүдэй ажалай уялга хадаа, минии һанахада, тон зүб һанамжа. Энэ һалбарида гүрэнэй болон нютагай өөһэдын хүтэлбэриин хамтаралга тааруу, - гэжэ Юрэнхылэгшэ хэлэбэ.
Анна Огороднигой гэрэл зураг
