​​Жэлэй дүнгүүд

Ородой Холбоото Уласай Юрэнхылэгшэ Владимир Путинай 2018 оной ноябриин 3-ай зарлигаар Буряад Улас Алас Дурнын тойрогой бүридэлдэ оруулагдаа һэн. Тиигэжэ шэнэ арга боломжонууд нээгдэжэ, Буряадта мүнгэн тэдхэмжэ үзүүлэгдэжэ эхилээ.

Түүхэтэ үйлэ хэрэгэй болоһоор түхэреэн жэл үнгэршэбэ. Энэ хугасаада Буряадтамнай ямар ажал хэгдээб гэжэ уласай хүтэлбэрилэгшэ Алексей Цыденов Фейсбук хуудаһандаа тоосоһон байна.

«Бүхыдөө Буряадта Алас Дурнын тойрогой тэдхэмжын ашаар һургуулинууд, хүүгэдэй сэсэрлигүүд, эмнэлгын газарнууд, соёлой, тамирай түбүүд баригдана. Тиихэдэ мүнгэ һомололгын хэмжээндэ уластамнай удха шанартай барилганууд хэгдэхэ. Тодорхойлбол, Үндэһэнэй музейн, «Байгал» театрай байшангууд, тамирай тулалдаануудай түб г.м.

Тиихэдэ гэр бүлэнүүдые дэмжэхэ талаар Алас Дурнын хүнгэлэлтэнүүд Буряад Уласай арад зондо хүртөөгдэжэ эхилээ. Гурбадахи үхибүүтэй болоһон айлнуудта һара бүри 11,2 мянган түхэриг түлэгдэнэ. Гэхэтэй хамта, хоёрдохи үхибүүтэй болоходо түлэгдэдэг федеральна эхын капиталда нэмэгдэжэ, можо нютагай эхын капитал - 136 мянган түхэриг, түрүүшын үхибүүтэй болоһон гэр бүлэнүүдтэ нэгэ доро 21 986 түхэриг түлэгдэхэ.

Алас Дурнын тойрогой бүридэлдэ ороһоор хэгдэһэн ажалай дүнгүүд иигээд лэ дүүрэшэнэгүй», - гээд, Алексей Цыденов тоособо.

Буряад Уласай Засагай газарай мэдээсэлэй албанай гэрэл зураг