726
Буряад Уласай Толгойлогшо Алексей Цыденов Юлия Дагдановае Ородой Холбоото Уласай Юрэнхылэгшын бүрин эрхэтэ түлөөлэлгын газарай даргын эдэй засагай ба хүрэнгэ оруулалтын талаар орлогшын тушаалда ноябриин 1-һээ томилоо.
Юлия Дагданова энээнһээ урид уласай хүдөө ажахын ба эдеэ хоолой сайдай орлогшо – эдэй засагай ба мүнгэн һангай хорооной түрүүлэгшын тушаал эзэлжэ байгаа. Тус тогтоол Буряад Уласай Толгойлогшо октябриин 18-да гаргаа.
- Буряад Уласай хүдөө ажахын яаманда хүдэлһэнэй ашаар уласай байдал мэдэнэб. Засагай газарай эдэй засагай һалбарида ямар асуудал, зорилго бэелүүлхэб гэжэ ойлгоноб. Федеральна засаг зургаануудтай саашанхи харилсаа байгуулха, манай уласта бюджедэй ба бюджедһээ гадуур хүрэнгэ оруулха хэрэгтэй. Табигдаһан зорилгонуудые бэелүүлгэдэ минии дүй туһатай байха гэжэ этигэнэб. Минии саашанхи ажал Буряад орон хүгжөөлгэтэй холбоотой байхань намда ехэ һайшаалтай, - гэжэ Юлия Дагданова тэмдэглээ.
Тобшо мэдээ.
Дагданова Юлия Григорьевна Улаан-Үдэдэ 1977 оной февралиин 7-до түрэһэн. 1998 ондо Москвада “Мүнгэн сан ба урьһаламжа” гэһэн мэргэжэлээр Г.В. Плехановай нэрэмжэтэ Ородой Холбоото Уласай эдэй засагай академи эрхимээр дүүргээ. 1999-2002 онуудта Буряад Уласай эдэй засагай ба гадаада харилсаанай яаманай гадаада эдэй засагай харилсаанай хороондо хүдэлөө.
2000 онһоо 2003 он болотор “Дэлхэйн эдэй засаг” гэһэн мэргэжэлээр Ородой Холбоото Уласай Юрэнхылэгшын дэргэдэхи Ород гүрэнэй албанай академидэ аспирантурада һураа, тэрэнээ заочно дүүргээ.
2002 оной ноябрьһаа 2007 оной ноябрь хүрэтэр Улаан-Баатар хотодо Монголдо Буряад Уласай Засагай газарай түлөөлэлгын зүблэгшын тушаал эзэлжэ байгаа.
2007 оной ноябрьһаа Буряад Уласай Хүдөө ажахын ба эдеэ хоолой яаманда ажалайнгаа намтар үргэжэлүүлээ, эдэй засагай ба гадаада харилсаанай таһаг даагаа. 2010 оной июль соо Буряад Уласай Хүдөө ажахын ба хоол хүнэһэнэй сайдай орлогшын тушаалда томилогдоо. 2019 оной ноябрь соо Ородой Холбоото Уласай Юрэнхылэгшын бүрин эрхэтэ түлөөлэлгын газарай даргын эдэй засагай ба хүрэнгэ оруулалтын талаар орлогшын тушаалда томилогдоо. Буряад Уласай гүрэнэй засагай 1-дэхи классай бодото зүблэгшэ, “Буряад Уласай габьяата эдэй засагша” хүндэтэ нэрэ зэргэдэ хүртэһэн.
“Найрамдалай мүнгэн одон” гэһэн монголой одонгоор, “ОХУ-гай хүдөө ажахын яаманай Хүндэлэлэй грамотаар, Бүхэроссиин хүдөө ажахын тоолоон үнгэргэхэдэ ажал хэһэнэй түлөө медаляар, Буряад Уласай хүдөө ажахын һалбариин хүгжэлтэдэ хубитаяа оруулһанай түлөө медаляар шагнагдаһан.
Хадамтай, хоёр хүүгэдые хүмүүжүүлнэ.
