​Үндэһэн соёл үргэгдэхэ

Бүхы Ород гүрэнэй ажабайдалда, бүхы үндэһэ яһатанда тон удха шанартай үйлэ хэрэг - Үндэһэн хуулида оруулагдаха заһалтануудай түлөө дуугаа үгэлгэ аяар долоон хоногто үргэлжэлжэ, гол үдэрынь июлиин 1 гэжэ тогтоогдобо. Шухала удхатай тус үйлэ хэрэг апрелиин 22-то эмхидхэгдэхэ аад, коронавирус үбшэнһөө боложо хойшолуулагдаа һэн гээд һануулая.

Шэнэ аргаар

Июниин 25-һаа июлиин 1 болотор гэртээ үгы байха зон һунгалтын комиссинуудта электрон аргаар мэдүүлгэ оруулжа, байһан газарһаа энэ хэмжээндэ хабаадахаяа гуйлта эринэ.

Мүн Москва болон Нижний Новгород хотонуудай ажаһуугшад гэрһээ электрон аргаар дуугаа үгэхэ аргатай болоо. Юуб гэхэдэ, һунгалтын иимэ шэнэ гурим һаяхана Гүрэнэй Дүүмэдэ хуулита болгогдоо. Тиимэһээ ниислэлэй арад зон Ород гүрэнэй бусад хүнүүдһээ урид шэнэ гуримые бэе дээрээ туршан үзэхэ болоно.

Дуугаа үгэлгэ һунгалтын газарнуудта эмхидхэгдэхээр хараалагдана. Бүхы участогуудта хоёр үүдэн нээгдээтэй байха. Хүнүүд нэгэ үүдээр ороод, нүгөөдөөрнь гаража ошохо болоно. Нэгэ доро олон хүниие суглуулхагүйн түлөө иимэ ябадалнууд хэгдэнэ гээшэ.

Дунда һуралсалай гуламтануудай байшангуудта оршодог һунгуулиин участогуудта хэрэглэгдэһэн видеокамеранууд аха классай һурагшадай гүрэнэй нэгэдэмэл шалгалта барилгын үедэ хэрэгтэй болохоор хараалагдана.

Соёлой талаар заһабари

Үндэһэн хуулида заһалтануудые оруулха тухай дурадхал Юрэнхылэгшэ Владимир Путин 2020 оной январиин эхиндэ оруулаа һэн. Мартын эхин болотор Ород гүрэн дотор заһалтануудые дурадхаха талаар олон тоото суглаанууд эмхидхэгдээ. Гол нэмэлтэнүүд нэгэдэжэ, ямар заһабари Конституцида орохоб гэжэ элирүүлэгдээ.

Зарим заһалтануудтай сонинойнгоо хуудаһануудта хүндэтэ уншагшадаа март һарада танилсуулаа һэмди гээд һануулая. Мүнөөдэр энэ хэрэгээ үргэлжэлүүлэн, үндэһэн соёлой талаар заһабари тухай хэдэн үгэ хэлэхэ һанаатайбди.

Үнгэрһэн долоон хоногто Улаан-Үдэдэ Үндэһэтэнэй номой сангай шэнэ байшанай нээлгын баяр ёһолол Ородой Юрэнхылэгшэ Владимир Путин Буряадай Толгойлогшо Алексей Цыденовэй хабаадалгатайгаар үнгэргэбэ. Энэ ушараар Владимир Путин баярай үгэ хэлэхэдээ, номой сангай ажалшадай адли тэгшээр буряад ба ород хэлэндэ хандадаг байһые онсо тэмдэглээ.

- Олон арадуудые багтааһан манай гүрэн дотор алишье үндэһэ яһатанай соёл, хэлэн, ёһо заншал үндэрөөр сэгнэгдэнэ. Энэ манай баялиг гээшэ. Энээниие хамгаалха, бүри ехээр хүгжөөхэ уялгатайбди, - гэжэ Владимир Путин хэлээ.

Үндэһэтэнэй номой сангай захирал Людмила Гармаева, соёл хүгжөөлгын талаар Үндэһэн хуулида заһабари дэмжэжэ байһанаа мэдүүлээ.

- Гүрэн дотор ажаһуудаг үндэһэ яһатануудай соёл, ёһо заншал алдабал, өөрын “нюургүй” болохобди гэжэ һайн ойлгонобди. Энэ баялигые хамгаалха тухай заһабари хэгдэжэ байхада, ехэ баяртайбди. Соёлой һалбарида хүдэлдэг ажалшадта энэ ехэ удхатай, - гэжэ Людмила Гармаева хэлээ.

Буряадай номой сангай захиралай уряалһаар, дуугаа үгэлгын үдэртэ бултадаа хабаадая!