Угнаасай һайхан нютаг
«Ага спортивная» гэһэн аралжаанай бэшэ ниитын эмхи 2018 ондо үнгэргэгдэхэ хэмжээнүүдэй Ородой Холбоото Уласай Юрэнхылэгшын грант шүүгээ. Тиин июниин 20-ёодоор Хурамхаан аймагай Угнаасай нютагта «Хүүгэдэй үндэһэн буряад тамирай наадан” үнгэргэгдэхэ.
Хоёр жэлэй саана энэ жаса Тимченкын жасын соносхоһон харалганда хабаадажа, “Угнаасайда хүүгэдэй ёохор” гэһэн түсэлөөр шалгаржа, Угнаасай гэжэ гоё һайхан газарта олон үхибүүдэй хаабадалгатай наада эмхидхээ бэлэй. Харин мүнөө жэл тэндэ тамирай ехэ наада үнгэргэхэнь.
“Юундэ “Ага спортивная” гэһэн эмхи аад, Гаарга нютагта хэмжээ ябуулгануудые эмхидхэдэг юм?” - гэжэ хүн зон намһаа асуудаг. Үнэхөөрөөшье, энэ ниитэ жаса Ага нютагһаа һабагшатай. Зүгөөр түрүүлэгшэнь Ага нютагай Баир Цыренгармаев, харин гүйсэдхэхы захиралынь Гаарга нютагай Цыпелма Батуева юм. Тиимэһээл элдэб янзын харалгануудта хабаадажа, һонин түсэлнүүдые хамгаалжа, мүнгэн дэмжэлгэнүүдтэ хүртэжэ, Агыншье, Хурамхаанайшье үхибүүдые хабаадуулдаг.
Гааргын багшанарай суглаанда
Соодой ламын дурасхаалда зорюулагдана
Мүнөө жэл шүүһэн грантын ёһоор, «Хүүгэдэй үндэһэн буряад тамирай фестиваль” байгша оной июниин хорёодоор Арзгун нютагай дэбисхэр дээрэ оршодог Угнаасай һайхан газарта үнгэргэгдэхэ гэжэ дээрэ дуулгаа һэм.
- Фестиваль хоёр шэглэлээр үнгэрхэ: тамирай болон буряад хубсаһанай. Тамирай мүрысөөнүүд гэхэдэ, мори урилдаан, буряад барилдаан, һур харбаан болоно. Хоёрдохи шэглэлынь - “Би ба минии бүлэ”, “Би ба минии нүхэд” гээд, үхибүүдэй буряад хубсаһанай харалган болоно, - гэжэ Цыпелма Борисовна хөөрэнэ.
Фестиваль Угнаасайн дуганда Соодой ламада зорюулагдаһан уншалгаар эхилхэ. Зуу гаран жэлэй саана Соодой лама энэ газарта ерээдүй сагай дасан бодхоохо гэжэ хэлээд, дүрбэлжэн талмайда дүрбэн модо зооһон юм. Тэрэ дүрбэн мододынь мүнөөшье болотор тэрэл газартаа зоогдоһон хэбээрээ.
Соодой ламын зооһон бахана
Мори урилдаагаар Арзгун нютагайхид ходо түрүүшүүлэй тоодо ябадаг. Тиимэһээ үхибүүдые энэ шэглэлээр дэмжэхэ шухала. Нютагай хүдөө ажахын үмсын хэрэг эрхилэгшэ Арабжил Очирович адуу үсхэбэрилдэг юм. Моридой урилдаха зам ута болгохо тухай һанамжа оруулаад, мүнөө талмайень бэлдэжэ байна.
- Үхибүүд нютаг дээрээ багахан зайда мори унаад гүйлгэлдэнэ, харин ондоо тээшээ ошоод мүрысэхэдөө, холо зайда ядалдана. Тиимэһээ ута зам бэлдэхэ хэрэгтэй, - гэжэ хүдөө ажахын ветеран тэмдэглэбэ.
Һур харбалга - үндэһэн буряад тамирай зүйл, “Эрын гурбан нааданда” ородог гээшэ. Тиин түсэлэй ёһоор, хоёр номо һурша Гааргын һургуулида бэлэглэгдэхэ. Хүдөөгэй үхибүүдые һорихо хэрэгтэ энэнь тон һайнаар нүлөөлхэ ха юм даа.
Барилдаанай хибэс бэлэг барюулагдаха
Буряад барилдаагаар Гаарга нютагайхид һүүлэй үедэ үхибүүдээ ехэ һайнаар һоридог болонхой. Ушар юуб гэхэдэ, тамиршан Тарас Евреев нютагаа бусажа, бүхэ барилдаанай секци нээгээ. Наһанайнь нүхэр Любовь Гармаевна нютагайнгаа һургуулиин завучаар хүдэлнэ. Залуу гэр бүлэ хотодо һайн һуугаашье һаа, нютагаа үргэлсэхэ зорилготой бусаад, амжалтатай хүдэлнэ.
Тарас Михайлович олон хэмжээ ябуулгануудые эмхидхэнэ. Сагаалганиие угтуулан, бүхэ барилдаагаар мүрысөө үнгэргөө. Нютагһаань гарбалтай олзын хэрэг эрхилэгшэдые эбээн тэдхэгшэд болгожо, ехэ һайн шангуудые бэлдээ. Тиин хэмжээ ябуулгынгаа үргэн дэлисэтэйгээр үнгэрхэдэ, бүхы зон сэдьхэлээ ханажа баясаа бшуу.
Һаяшаг волейболоор мүрысөөн болоо. Энэ удаа Тарас Михайлович хуули хамгаалгын албанай хүдэлмэрилэгшэдые болон ветерануудые туһалхыень уряалжа, баһал ехэ һайн мүрысөө эмхидхээ юм.
Иимэ эдэбхитэй, урагшаа һанаатай хүнэй нютаг дээрээ ямаршье түлбэригүйгөөр ниитэ ажал ябуулжа байхыень анхаржа, Цыпелма Борисовна зорюута барилдаанай хибэс худалдажа абахын тула, түсэл бэшэһэн байгаа. Үрэ дүнгынь – һаядаа 190 мянгаад түхэригтэ хибэс Хурамхаан аймагай Арзгун нютаг хүрэжэ ерэхэ юм. Хэн мүнөө сагта иимэ мүнгэ гаргаад үгэжэрхихэб даа. Түсэлнүүдыел зохёожо, гүрэнэй хэмжээнэй харалганда һайнаар хамгаалжа шадаһанайхиие зөөритэй болоно.
- Манай нютагта барилдаагаар ори ганса тамирай мастер Виктор Гашинов байһан юм. Мүнөө Буряадай Толгойлогшын шанда хүртэхын түлөө мүрысөөндэ нютагаймнай хүбүүн Александр Гармаев абарга болоо бшуу. Иимэ амжалта туйлажа байһан тамиршадаа дэмжэнгүй яахаб. Хибэстэй болоходоо, бэлигтэй барилдаашад хүмүүжүүлэгдэжэ, холо ойроор суурхана бэзэ, - гэжэ Цыпелма Борисовна тэмдэглэбэ.
Найман ханатай тамирай байшан хэрэгтэй
Тэрэ үнэ сэнтэй хибэсээ дэлгээжэ, барилдаагаар бэеэ һорихо гэхэдээ, тусхай байшан хэрэгтэй болоно. Энэ асуудалаар “Ага спортивная” жасын гүйсэдхэхы захирал Хамба лама Дамба Аюшеевтэ хандаа бэлэй. Тиихэдэнь Хамба лама: “Хурамхаанайхид ой модон соо байдаг зон хаадаа бариит одоо”, - гэжэ хэлээ. Мүнөө барилдаанай һэеы гэр гэжэ нэрлээд, найман ханатай модон байшангуудые хаа-хаанагүй баридаг болонхой. Арзгун нютагайхид сугларжа, эбээрээ хэлсэжэ, һаядаашье иимэ байшан бодхоожорхихо аргатай. Илангаяа эдэбхи ехэтэй, урагшаа һанаатай тамирай багша Тарас Евреев нютагаа бусаад, ниитэ ажал ябуулжа байна ха юм.
Хубсаһанай харалганда заншалта болон мүнөө үеын маягтай хубсаһа үмдэжэ болоно. Гаарга нютагһаа уг гарбалтай гэр бүлэ аяар Санкт- Петербургһаа ерэхэ. Мүн Агын үхибүүд хабаадуулагдаха юм.
- Багахан хүдөө һууринуудта ондоо тээхи зоной хабаадалгатай хэмжээ ябуулгануудай үнгэргэгдэхэдэ, нютагай үхибүүд энэ ехэ талмайн эзэд гээшэбди гэжэ мэдэржэ, үндэр хэмжээндэ бэлдэхые оролдожо, нютагай шарай һэргэнэ бшуу, - гэжэ Цыпелма Борисовна хэлэбэ.
Цыпелма Батуева
Нээрээшье, бага һууринуудай олонхи хүүгэд ехэ хэмжээ ябуулгануудые харадаггүй, өөрөөл хабаадагша болоо һаань, үсөөхэндэнь лэ иимэ аза талаан тудадаг ха юм.
Малшадай жэшээтэ байдал
Цыпелма Борисовна харалгануудта хабаадаха талаар дүршэл ехэтэй болонхой. Һаяхан Буряад Уласай Засагай газарай соносхоһон грант шүүжэ, 240 мянган түхэригэй дэмжэлгэдэ хүртөө. Түсэлөө “Ариг Ус” телекомпаниин сурбалжалагша Даши-Доржо Болотовтой суг бэелүүлхэ юм. Гол зорилгонь - хүдөө нютагуудай ажалша малша зон тухай баримтата фильмнүүдые буулгаха.
- Мүнөө сагта хэды олон залуушуул хотонуудта ажаһуунаб даа. Һайн ажал үгы, гэршье байхагүй, нилээд зүдэрнэ. Тэдэндэ нютагаа ерээд, амжалтатай ажаһуухаар гэжэ бодото жэшээнүүд дээрэ харуулха хүсэлтэйбди, - гэжэ Цыпелма Батуева мэдээсэбэ.
Үнэхөөрөө, ажалай хэрэгээр хүдөө аймагуудаар ябахадаа, нютагтаа адуу малаа үсхэбэрилжэ, таряа талхаа тарижа, огородой эдеэ ургуулжа байһан залуу гэр бүлэнүүдэй ажаһуудалтай танилсадагбди. Модон гэрээ болбосон түхэлтэй болгонхой, үнэтэй һайн авто-хүлэг унанхай, мүн хэдэн хүүгэдтэй боложо үрдиһэн амжалта түгэс залуу гэр бүлэнүүд бии. Тэдэ хотодо багахан салингай түлөө зүдэрэнгүй, нютаг дээрээ өөртөө ажал хэжэ байһандаа сэдьхэл дүүрэн ябанал даа. Залуушуул иимэ жэшээнүүд тухай баримтата фильмнүүдые харахадаа, тэхэрин бусажа, угайнгаа бууса һэргээхэ, мал үсхэбэрилхэ хүсэл һаналтай болохонь магадгүй.