Эмнигые һургаха гэжэ түрэдэг юм даа эсэгын хүбүүд
Яруунын Үльдэргэдэ үнгэрһэн Мянган адуунай найрай хэмжээн соо урилдаануудта хабаадагшадай тоо урда жэлнүүдһээ үлүү олон байгаа гээд, эмхидхэгшэд мэдээсэбэ. Хэрбэеэ даага дэллэхэеэ 16 команда буугаа һаа, аяар 81 гүйгөөшэд 9 зайда урилдаа.
Агын команда амжалта туйлаба
Буряадай аймагуудһаа, Үбэр Байгалай хизаарһаа болон Шэнэхээнһээ ерэһэн 16 команда адуушанай шадаха бүхы арга боломжонуудые харуулаа. Мори ургалха, эмээллэхэ, мориной гүйдэл дунда номо годлёор харбаха ба даага дэллэхэ талаар бусадһаа эрхим байһанаа Агын Зугаалайн хоёр команда гэршэлээ. Байгша оной апрелиин 28-да Агын тойрогто болоһон Даага дэллээндэ 19 команда сооһоо Зугаалайн бэрхэшүүл Догойн командада шүүгдэжэ, II һуурида гараһан юм. Харин Үльдэргэдэ түрүүшын хоёр һууринуудые эзэлжэ, 50 болон 30 мянган түхэриг шан абаад, нютагаа бусаба. Тиихэдэ үльдэргынхидэй бүридүүлһэн команда III һуурида гараа.
Урда жэл Хэжэнгын Загаһатын команда түрүүшын һуури абаһан гээд һануулая. Энэ амжалтаяа дабтажа шадаагүй.
Хэжэнгын хүлэгүүдые хүсэхэнь хэсүү
Адуушанай найр анха түрүүшынхиеэ урзанда үльдэргынхидэй эмхидхэхэдэнь, 60-аад морин урилдаа бэлэй. Зүгөөр нёдондо 74 морин байгаа. Харин байгша ондо 81 морин болоо. Энээндэнь эмхидхэгшэд ехэ олзуурхана.
Мори урилдаанай гол шүүгшэ Цырен Жаргаловай дуулгаһаар, Хэжэнгын морид хэдэн зайда түрүүлжэ ерээ. Ородой-Адагай Аюр Сампиловай Теодор ба Скарлетт гэжэ хүлэгүүд даагануудай болон гунануудай дундаһаа тон эрхимүүд гэжэ элирээ. Эгээл богони 1200 болон 1600 метрэй зайда эдэ урилдаһан байна. Тиихэдэ 8000 метрэй тон ута зайда урилдаһан 11 хүлэгүүдһээ баһал Хэжэнгын Доржи Дашидылыковэй Лэгдэн гэжэ морин түрүүлээ.
Сэлэнгын Ноёхоной мэдээжэ абарга Зоригто Цырендондоповой һориһон Хонгор гэжэ буряад азаргань 4800 метрэй зайда бултаниие хүсэжэ шадаа.
Улаан-Үдын ипподромой захирал Фёдор Шантагаровай Акбар болон Альф гэжэ моридынь түрүүлжэ, эзэнэйнгээ нэрэ нэрлүүлбэ. 6000 зайда Ивалгын Оронгын Гомбо Бадмаевай Бар гэжэ шара азарга эрхимлээ. 3200 метрэй зайда Яруунын Мүнхэ Шираповай морин бусадһаа түрүүн ерээ.
Хүсэһэнөө хүсэлдүүлээбди. Ажалша малша арад зоной ёһотой найр болоо гээд, «Үльдэргэ» ажахын захирал Булад Будажанаев тобшолол хэбэ.
Александр ГАРМАЕВАЙ гэрэл зурагууд