245
- Шэнжэлэлгын ажал бүри hайн шанартай болгохо талаар 55, 8 сая түхэригэй компьютернэ томограф худалдан абтаа. Энэ хэрэгтэ юрэнхылэгшын Алас Дурна тойрогой тэдхэмжын хэмжээндэ мүнгэн hомологдоо.
Түргэн туhаламжын больницада үдэр бүри 200-гаад хүн эмнэлгын туhада хандажа ородог. Тиимэhээ hайн шанартай шэнжэлэлгэ хадаа ехэ удха шанартай, юуб гэбэл саг соо хэгдэhэн шэнжэлгэhээ эмнэлгэ дулдыдына ха юм.
Энээнhээ урид эмнэлгын хуушарhан тоног хэрэгсэлээр шэнжэлгэнүүд удаан сагта хэгдэжэ байгаа. Мүнөө эндэ Scenaria гэhэн шэнэ үеын томограф тодхоно. Япониин «Hitachi» компани байгуулагдаhаар зуун жэлэйнгээ ойн баярта энэ аппарат бүтээжэ гаргаа. Энэнь компаниин ехэ туйлалта болоhон байна.
- Түргэн туhаламджын больницада hайн шанартай эмнэлгын хэрэгсэнлүүдээр хангалга хадаа тон шухала. Юундэб гэхэдэ, олон шэглэлтэй больницанууд ехэнхи үбшэ эмнэлгэдэ туhа хүргэнэ ха юм. Тиимэhээ түргэн, hайн шанартай шэнжэлгэ хэгдэхэ ёhотой. Компьютерна шэнэ томографтай боложо, шэнжэлгэ буруугаар хэгдэжэ болохо ябадалhаа аршалагдаабди, - гэжэ Буряад Уласай элүүрые хамгаалгын сайд Евгения Лудупова хэлэбэ.
Энэ түсэлдэ hайн шанартай КТ-зураг хэгдэхэ аргатай, тиихэдэ үбшэнтэнэй бэеын скан hайн шанартайгаар хэгдэхэ.
- Хүнэй доторой махабад шэнжэлхэ талаар ажал урагшатай бэелүүлэгдэжэ, үбшэн ямар шатадаб гэжэ энэ аппарадай хүсөөр түргөөр мэдээсэл абахабди. Рентгенолог-эмшэндэ хүнэй бэе дотор болоhон хубилалтануудые адаглаха талаар ехэ алхам болоно, - гэжэ уласай түргэн туhаламжын больницын рентгенолог Бато Рыгзынов шэнэ тоног хэрэгсэлэй арга боломжо тухай хөөрэнэ.
Ородой Холбоото Уласай Юрэнхылэгшэ Владимир Путинай Алас Дурнын тойрогой можо нютагуудай хүгжэлтэдэ hомолhон тэдхэмжын ашаар шэнэ аппарат худалдан абтаа. Тоног хэрэгсэлэй үнэтэй сэнhээ боложо, уласай бюджедээр абахаар бэшэ. Тэдхэмжын ашаар эмнэлгын тоног хэрэгсэлнүүд хүдөөгэй больницануудташье худалдан абтана. Буряад уласай аймагуудай болон хотын эмнэлгын эмхинүүд 1,6 миллиард түхэригэй эмнэлгын тоног хэрэгсэлнүүдтэй болоо.
