448
Интернет гээшэ хүн түрэлтэнэй түүхэдэ туйлай ехэ туйлалтануудай нэгэн гэжэ хэлэхээр. Тэрэнэй ашаар ажабайдалнай амаргүй хүнгэн, түргэн урасхалтай болоо. Бүмбэрсэгэй нүгөө талада байһан зонтой «улаан нюураараа уулзажа» харилсаха аргатайбди. Тэрээнһээ гадуур зарим зон Интернедэй, илангаяа Инстаграм холбооной аргаар ажалаа ябуулжа, мүнгэ олоно. Энээн тухай манай мүнөөдэрэй асуулта.
Алексей Раднаев, хатаршан, хүтэлэгшэ:
- Интернедэй аргаар олзо оруулжа байхаар. Арганууд дүүрэн. Нэн түрүүн Интернет соо хүн өөрын хуудаһатай байха ёһотой. Тэрэнь элдэбын байжа болоно. Мүнгэ олохо гэбэл, танай хуудаһан олон уншагшадтай байха ёһотой. Жэшээнь, Инстаграм холбоондо хуудаһа нээгээд, тэрэнээ һонирхолтойгоор зохёожо ябуулбал, зон өөһэдөө түргэн сугларха. Би тусхайтаар олон зониие суглуулха һэдэлгэ хэдэг бэшэб, тиибэшье минии хуудаһанда 17 мянга гаран хүн хамааранхай.
Лосолма Протасова, зүжэгшэн:
- Минии Инстаграм-хуудаһанда 20 мянган хүн тоологдоно. Мүнгэн бага ехээршье һаань олдоно. Һайнаар ажалаа ябуулбал, үшөөшье олохоор. Теэд амаргүй ехэ саг хэрэгтэй. Би үдэр бүхэндэ 5 саг үлүүтэй тэрээндээ зорюулнаб. Тиихэдэнь өөрыншни гол ажал, гэр мал, үхи хүүгэд гэжэ байха. Хүнэй һонирхожо харахаар, ходол шинии хуудаһа үзэжэ байхаар юумэнүүдые һанажа толилхо хэрэгтэй. Минии хуудаһанда ехэнхидээ шог ёгто видео толилогдодог.
Эдуард Будажапов, дуушан, хүтэлэгшэ:
- Мүнгэ олохоёо һанабал, хүн зондо туһатай мэдээнүүдые толилжо, өөрынгөө хуудаһандаа олоор зониие оруулха хэрэгтэй гэжэ би һананаб. Үдэр бүри һургаалтай, анхарал татахаар, ямар бэ даа һанагдаагүй юумэн зохёогдохо ёһотой. Зарим зон өөрынгөө ажал харуулна, нүгөөдэнь хаана ошоһоноо, юу эдиһэнээ һайрхажа, зураг сохёод харуулна. Тэрэнь хайшаа юм даа? Хүн бүхэнэй хуби заяан хуу ондо ондоо, эрилтэ асуултаньшье баһа адли бэшэ. Минии хуудаһанда ехэнхидээ түрэл гаралнуудни, анда нүхэдни, танилнуудни хамааранхай. Тиимэһээ балай би мүнгэ ехээр сохижо үзөөшьегүйб. Юрэл би - шамда, ши - намда гэжэ хэлсээд, жэжэхэн нэгэ хэдэн ажал ябуулаа һэм.
Бадмажаб Бабуева, хүгшэн эжы:
- Хари, минии аша хүбүүн һүүлэй хоёр жэлэй туршада: «Блогер болохомни, үнэтэй гоё гарай утаһа абажа үгэ», - гээд, эхэ, эсэгэеэ дайлажа, алахын наана болонхой. Тэрэ блогер гээшэнь юу хэдэг зон гээшэ юм бэ, бү мэдэе. Минии һанахада, тэндээ үнөөхидшни гэрэл зурагуудаараа андалдаха, энэ тэрэ ажабайдал үзэдэг бэшэ гү даа. Тэрэ тэндэ тэрээнтэй тиибэ, эндэ тэрэ энээниие эдибэ гэжэ зугаа, хөөрөөн болгожо байха - ямархан саг гээшэб? Бидэнэй залууда хүбүүднай сэрэгшэд, космонавтнууд, харин басагаднай эмшэд, багшанар болохомнай гээд, гүйлдэдэг бэлэйбди. Саг сагтаа гээшэнь энэл ха юм даа.
Цырен Батоцыренов, оюутан:
- Би зүжэгшэн һэн хойноо буряад хэлээрээ энеэдэтэй ушарнуудые өөрөө зохёогоод, тэрэнээ буулгаад, олондо үзүүлдэг болонхойб. Тиигэжэ Инстаграмда өөрынгөө хуудаһанда оруулха гэжэ аһан ехээр оролдоноб. Мүнгэ олохоор ааб даа, тиимэ жэшээнүүд байна ха юм. Тиигэхын тула зониие һонирхуулха гэжэ ажалаа зохёоноб гэжэ үшөө дахин хэлэнэб. Минии хуудаһанда орожо харыт, һонирхолтой байбал хамаарыт гэжэ хэлэхэ байнаб.
Жаргал Раднаев, жолоошон:
- Ямаршье ажал хэбэл, олзо олдохо гэжэ һананаб. Теэд би өөрөө Интернедэй аргаар мүнгэ сохижо үзөөшьегүйб. Хэды тиигэбэ яабашье, тэрэ Инстаграм соо шинии хэһэн зохёол тон һонирхожо харамаар байна гээд, нүхэдни хэлсэдэг. Бидэ үетэн нүхэдөөрөө вайбер гэдэг холбоондо өөһэдын бүлэгтэйбди, тэндээ харилсадагбди. Нэгэ амаралтынгаа үдэр дуу дуулажа, видео буулгаад, нүхэдтөө эльгээжэрхёо һэм. Тэдэмни улам саашань Инстаграм холбоондо толилоо. Тиихэдэнь өөрөө Инстаграмда хуудаһа нээгээд, тэндээ дуулаһанаа буулгажа табидаг болооб. Нёдондо хабар энэ ажал эхилхэдээ, тиимэ олон зониие хамааруулха гэһэн бодол байгаагүй. Тиигэбэшье мүнөөдөө хуудаһандамни 4 мянга шахуу хүн хамааранхай. Юрын жолоошоной хуудаһан гэжэ бодоходо, яһала олон гэжэ һананаб.
Наталья Гармаева, залуу эжы:
- Инстаграм гээшэнь юун юм ааб гээд, 2014 ондо тэндэ хабсараа һэм. Аяар гурбан жэлэй туршада тэндээ «тагнуул» хээб. Энэ үеэр хоёрдохи үриеэ түрөөб. Хоёр хүүгэдэй эжы гэртээ байхадаа, яагаад ажалаа ябуулжа үрдинэб гэжэ харуулха зорилготойгоор Инстаграмдаа ажал эхилээб. Тэрэ гэһээр, нэгэ хараа бодолтой олон нүхэдтэй болооб, орон дэлхэйе ондоо нюдөөр шэртэжэ эхилээб. Би энэ аргаар мүнгэ олохо зорилго түбхын түрүүндэ табина бэшэб. Харин дуратай юумэеэ хэхэ мүртөө, үшөө урмашуулгада хүртэжэ байхада, яһала гоё. Инстаграм холбооной аргаар өөрынгөө һуралсалай түб нээжэ шадааб. Минии хуудаһа уншагшадай 85 хубинь эхэнэрнүүд. Тэдэ өөһэдтөө хэрэгтэй шэнэ мэдэсэ, һургаал заабарида хүртэнэ. Үнэн зүрхэнһөө оролдожо, юумэ хэбэл, олондо һонирхолтой байха гэжэ һананаб. Худалай харгы богони. Хүн хаанашье ажаллабал, уһа сохижо ябангүй, оролдолго гаргаа һаа, ямаршье сагта, ямаршье аргаар альгаяа алталжа шадаха гэһэн тобшолол хэхээр. Булат БАДМАЕВ
