​Ваджра-гуру Бидия Дандарон

Буддын шажан шэнжэлэгшэ, түүхын эрдэмэй дид-доктор Андрей Стрелковой «Ваджра-гуру Бидия Дандарон» (Улан-Удэ: Удумбара, 2016) гэһэн ном нэмэгдэн шэнэлэгдээд, хоёрдохиёо хэблэгдэбэ.

Гансашье Буряад орондо бэшэ, бүхы Ородой Холбооной Уласта мэдээжэ буддын шажан дагагша, багша, зүүн зүг шэнжэлдэг эрдэмтэн Бидия Дандарович Дандароной (1913–1974) түрэһөөр 103 жэл гүйсэбэ. Тус ном соо Дандароной намтар, ажал ябуулга,түбэд, буряад хэлэнүүд дээрэ гараһан текстнүүд, мүн баһа түрэлхидэйнь ба нютагайхидайнь дурсалганууд дээрэ үндэһэлэн, тэрэнэй сахижа ябаһан һургаал тухай бэшэгдэнхэй юм. Суута ламанар Джя-яг Римбүүшэ Галсан Султим Данби Нима, Лубсан Сандан Цыденов, Агван Силнам гэгшэдэй һургаалнууд тухай энэ номой хуудаһануудта үгтэнхэй.