1068
Буряадай оперо болон баледэй театрай уран һайханай хүтэлбэрилэгшэ Морихиро Ивата хореографи хүгжөөлгэдэ аша габьяатай байһанайнгаа түлөө «Душа танца» гэһэн хүндэтэй шагналда хүртэхэеэ Москва хото ошохонь гэжэ Буряад Уласай Соёлой яаман мэдээсэнэ.
Тус хэмжээ ябуулгада илагшадай гала-концерт табигдаха байна. Тэдэнтэй хамта Морихиро Ивата хабаадалсаха юм. «Балет» сэтгүүлэй ахамад редактор В. И. Уральский Буряадай оперо болон баледэй театрай уран һайханай хүтэлбэрилэгшые урихадаа, иигэжэ хэлэһэн байна:
- -Тэрэнэй ажаябуулгые баледэй урлагай мэргэжэлтэд үндэрөөр сэгнэбэ.
Морихиро Ивата гэгшэтэй хамта манай театрай хатаршад Мидзуки Уэно болон Булыт Раднаев гэгшэд уригдаба. Санкт-Петербургын Александринска театрай тайзан дээрэ табигдаһан «Арабеск» гэһэн мүрысөөндэ тэдэнэй ялас гэмээр хатарһаниинь, мэдээжэ сэтгүүлдэ баледэй мэргэжэлтэд үндэрөөр сэгнэһэн байна.
«Балет» сэтгүүлэй редакци «Душа танца» гэһэн шан 1994 онһоо хойшо барюулдаг байна. Энэ хадаа хатарай һалбарида туйлаһан амжалтын түлөө Ород гүрэндэ жэл бүри олгогдодог баледэй талаар ганса шан юм. Иимэ үндэр сэгнэлтэдэ Игорь Моисеев, Юрий Григорович, Майя Плисецкая, Владимир Васильев, Николай Цискаридзе, Ульяна Лопаткина болон бусад хатаршад хүртэһэн байха юм.
Апрелиин 27-до Москва хотын К.С. Станиславскиин болон В.И. Немирович-Данченкын нэрэмжэтэ хүгжэмэй театрай тайзан дээрэ баяр ёһололой хэмжээ ябуулга үнгэргэгдэхэ юм.. 2016 оной ноябрь һарада энэл тайзан дээрэ «Легенда» гэһэн хүндэтэ шанда СССР-эй арадай зүжэгшэн Галина Шойдагбаева хүртэһэн эм гэжэ һануулнабди.
