733
2017 ондо 577 хүүгэдэй амаралтын, элүүржүүлгын лагерьнууд хүдэлхөөр хараалагдана. Эндэ 88200 үхибүүд амарха аргатай байха юм. Буряад Уласай Толгойлогшын уялга дүүргэгшэ Алексей Цыденов улас дотор үйлэдбэрилэгдэһэн эдеэ хоолоор лагерьнуудые хангаха шухала гэжэ тэмдэглэбэ.
- Ондоо хизаар можонуудай һү, мяха худалдан абажа байхагүй, Буряадтаа үйлэдбэрилэгдэһэн эдеэ хоол түрүүлэн абаха шухала. Буряад Уласай Үйлэдбэриин болон худалдаа наймаанай, Хүдөө ажахын болон эдеэ хоолой, Спортын болон залуушуулай бодолгын талаар яаамануудта энэ асуудалаар ажал ябуулхытнай гуйнаб, - гэжэ Алексей Самбуевич хэлэбэ.
2017 оной Буряад Уласай Засагай газарай “Зунай амаралта эмхидхэхэ тухай” гэһэн тогтоолдо оруулагдаһан хубилалтануудай ёһоор, элүүржүүлгын эмхи бүхэн бүридхэлдэ абтажа, лицензировани гараха болоно.
Үшөө тиихэдэ, Краснодарай хизаарай амаралтын газарнуудта үхибүүд ошохоор түсэблэгдэнхэй. Уласхоорондын болон бүхэроссиин “Артек”, “Океан”, “Орлёнок”, “Смена” болон “Найрамдал” гэһэн лагерьнуудта үхибүүд ошожо амарха юм.
Анна Огороднигой гэрэл зураг.
