​Галина Ковалева: "Арадай Хурал ажалайм дүнгүүдые дэмжээ"

Буряад Уласай хуули сахигшын (прокуророй) тушаалда Галина Ковалёвае томилхо тухай Ородой Холбоото Уласай Юрэнхы прокурор Юрий Чайкын дурадхал Буряад Уласай Арадай Хурал һайшаан дэмжэбэ. 

Сессиин үзэмжэдэ – гансахан асуудал 

Үнгэрэгшэ долооной эсэстэ Улаан-Үдэдэ боложо үнгэрһэн ээлжээтэ бэшэ сесси дээрээ уласай парламент Галина Ковалёвае Буряад Уласай хуули сахигшын (прокуророй) тушаалда томилхо тухай асуудал зүбшэн хэлсэһэн байна. Сессиин эхиндэ Арадай Хуралай Түрүүлэгшын уялга саг зуура дүүргэгшэ Владимир Павлов ээлжээтэ бэшээр сугларһан ушараа бултанда мэдээсээд, ерэһэн айлшанда үгэ дамжуулаа. 

Ороной Юрэнхы прокуратурын Сибириин федеральна тойрогтохи хэлтэсэй дарга Владимир Токарев Арадай Хуралай сессидэ хабаадалсажа, Галина Ковалёвае Буряадай хуули сахигшын тушаалда томилхо тухай дурадхалые дэмжэхыень һунгамалнуудта хандаа. 1995 онһоо хойшо хуули сахидаг зургаануудта хүдэлжэ, ахамад мэргэжэлтын тушаалһаа уласай хуули сахигшын орлогшоор томилогдотороо Галина Николаевна эрхим бэрхээр алба хээ гэжэ тэрэ дарга тэмдэглээ. Буряад Уласай Арадай Хуралай Гүрэнэй байгуулалтын, нютагай өөһэдын хүтэлбэриин, хуули ёһоной болон гүрэнэй албанай асуудалнуудай талаар хорооной түрүүлэгшэ Борис Ботоев үгэ хэлэхэдээ, уласай парламентын бүхы хороонууд энэ асуудал зүбшэн хэлсэжэ, зүбшөөлөө уридшалан үгэһэн юм гэбэ. 

- Уласай прокуратурын ажаябуулгада, тэрэнэй болон Арадай Хуралай харилсаануудта, ниигэмэй-эдэй засагай хүгжэлтэдэ хабаатай асуудалнуудые һунгамалнуудай табихада, бултандань дүүрэн харюу Галина Николаевна үгэһэн байна, - гээд Борис Николаевич онсолоо. 

Дуу үгэһэнэй дүнгынь һайн 

Мүнөөдэр боложо үнгэрһэн ээлжээтэ бэшэ сесси дээрэ Галина Ковалёвада һунгамалнууд нэгэшье асуудал табингүй, саашанхи ажалдаа амжалтатай хүдэлхыень хүсэжэ, үреэлэй үгэнүүдые хэлэһэн байха юм. Коммунис намые түлөөлдэг залуу һунгамал Баяр Цыренов Буряад Улас дотор үнгэргэгдэхэеэ байһан һунгалтада онсо анхаралаа хандуулжа, энэ шухала хэмжээ ябуулга хуулиин ёһоор үнгэргэхэ хэрэгтэ уласай хуули сахидаг зургаан туһалха зэргэтэй гэжэ тэмдэглээ. 

Гүрэнэй Юрэнхы хуули сахигшын дурадхал дэмжэхэ тухай арадай һунгамалнууд хэлэһэн байна. Хуули сахидаг зургаанда Галина Ковалёватай сугтаа ажаллаха үедөө тэрэнэй бэрхэ мэргэжэлтэ, ударидагша байһые мэдээ һэм гэжэ Матвей Гершевич мэдээсээ. Арадай Хуралай Можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар хорооной түрүүлэгшэ Цыденжаб Батуев мүн лэ дэмжэжэ, Галина Ковалёвагай саашанхи ажалдань амжалта хүсэбэ. Уласай парламентын Газарай асуудалнуудай, аграрна бодолгын болон эд хэрэглэлгын дэлгүүрэй талаар хорооной түрүүлэгшын орлогшо Баяр Гармаев һанамжаяа элирхэйлхэдээ: “Шэнэ прокурор Эрхүүһээ ерэжэ магад гэһэн һурагай гарахадань, бидэ буруушаажа байгаабди. Федеральна албан зургаанай манай эндэхи хүтэлбэрилэгшые баһал ондоо тээһээ эльгээхэнь гээшэ гү гэжэ һанагдаа. Харин Галина Николаевнагай нэрын нэрлэгдэхэдэ, һанаагаа амараабди: манай уласта түрэһэн, зоноо, нютагаа мэдэхэ, дээдэ шатын мэргэжэлтэ, өөрын хүн ха юм. Дэмжэнэбди!” – гэжэ онсолоо. Арадай Хуралай Ниигэмэй бодолгын талаар хорооной түрүүлэгшын орлогшо Светлана Будаева үгэ абахадаа, хуули сахидаг зургаан анха түрүүшынхиеэ эхэнэрэй шарайтай болохонь гэжэ тэмдэглээд, Галина Ковалёвада амжалта хүсэһэн байха юм. 

Ээлжээтэ бэшэ сессиин хүдэлмэридэ хабаадаһан арадай 52 һунгамалай 51-ниинь тус дурадхал дэмжэжэ, нэгэниинь лэ буруушаажа дуугаа үгэһэн байна. Буряад Уласай Арадай Хуралай зүгһөө Түрүүлэгшын уялгануудые саг зуура дүүргэгшэ Владимир Павлов уласай хуули сахигшын тушаалда томилогдохоёо байгаа Галина Ковалёвада элүүр энхые, энэ шухала тушаалдаа ашаг үрэтэйгөөр ажалаа ябуулхыень хүсөө. 

Харюу үгэ 

Харин уласай прокуророй тушаалда томилогдохоёо байһан Галина Ковалёва һунгамалнуудай дуугаа үгэһэнэй удаа харюу үгэ хэлэхэдээ, тэдэндээ баяраа мэдүүлээд: “Хэрбэеэ уласай прокуророй тушаалда томилогдоо һаа, танай дэмжэлгэ дээрэ сэгнэн, харюулха гэжэ оролдохоб. Мүнөөдэр танай асуудалнуудта, илангаяа һунгалтын талаар, харюусаха болоо һаа, иимэ: прокурор хадаа хамаг фракцинуудай, намуудай болон политическэ нэгэдэлнүүдэй урда прокурор лэ юм. Хуулита ёһоор, үнэн зүбөөр, сэхэ сэбэрээр һунгалта үнгэргэхэ гээшэ манай гол зорилго мүн”, - гэжэ тэмдэглээ. 

Мүн тиихэдэ Галина Ковалёва Арадай Хуралтай албанай талаар арбан долоон жэлэй туршада харилсан хүдэлһэнөө онсолоо. “Хэрбэеэ дуу үгэлгын дүнгүүдэй ондоо байгаа һаань, үнгэрһэн жэлнүүдэй туршада хэжэ ябаһан ажалаа буруушаажа, ерээдүйнгээ ажаябуулгые ондоогоор түсэблэхэ һэм. Харин мүнөө, һунгамалнуудай дуугаа иигэжэ үгөөд байхадань, тэдэнэй үндэр сэнгэлтэдэ, дэмжэлгэдэ хүртэхөөр ажаллажа ябаһанаа ойлгобоб”, - гээд Галина Николаевна баяраа мэдүүлһэн байха юм.

Урид хүдэлһэн хуули сахигшада – баяр баясхалан 

Буряад Уласай прокурор байһан Валерий Петровой Ородой Холбоото Уласай сэрэгэй ахамад хуули сахигшаар июниин 28-да томилогдоһоной һүүлдэ, энэ һарын 5-да Ородой Холбоото Уласай Юрэнхы хуули сахигша Юрий Чайка Галина Ковалёвае орондонь оруулха тухай мэдүүлжэ, Арадай Хуралай зүбшөөл абаха зорилготойгоор тусхай бэшэг эльгээгээ юм гэжэ һануулая. 

Зүбшэн хэлсэлгын үедэ Арадай Хуралай Ниигэмэй бодолгын талаар хорооной түрүүлэгшэ Александр Стопичев үгэ хэлэхэдээ, уласай урид байһан хуули сахигша Валерий Петровой ажаябуулгые үндэрөөр сэгнэхынгээ хажуугаар, өөрынгөө орондо бэрхэ халаан болохо хүниие бэлдэһэнэйнь түлөө баяр баясхалан хүргэһэн байна.

Манай гүрэндэ нютаг можонуудай, уласуудай хуули сахигшадые Ородой Холбоото Уласай Юрэнхылэгшэ өөрынгөө зарлигаар тушаалдань томилдог юм. Тиихынь урда тээ дэбжүүлэгдэһэн нюурнууд (кандидатуранууд) нютаг можонуудай хуули зохёон гаргадаг зургаануудта зүбшэн хэлсэгдэжэ, дэмжэгдэһэн байха ёһотой.

Тобшо мэдээн

Галина Николаевна КОВАЛЁВА – Буряад Уласай хуули сахигшын (прокуророй) орлогшо, юстициин ахалагша зүблэгшэ. 1968 ондо Улаан-Үдэдэ түрэһэн, 1992 ондо Куйбышев хотын авиационно дээдэ һургуули дүүргэһэн юм. 1992-1995 онуудта Улаан-Үдын “Теплоприбор” заводой зохёогшо инженерээр ажаллаа. 

1995 онһоо 2000 он болотор Буряад Уласай Хуули сахидаг зургаанай ахамад мэргэжэлтээр алба хаагаа. 2000 ондо Буряадай гүрэнэй ехэ һургуулиин хуули эрхын факультет дүүргэһэнэйнгээ удаа Хойто-Байгалай аймагууд хоорондын хуули сахидаг зургаанай ахалагша мүрдэгшын тушаалда хүдэлһэн юм. Удаань уласай прокуратурын шухала хэрэгүүдые мүрдэдэг таһагта ахалагша мүрдэгшөөр алба хээ. 

2001 онһоо хойшо уласай хуули сахидаг зургаанай (прокуратурын) хуули гүйсэдхэлгын болон хуулита дансануудай хуулитай зохилдоһые шалгадаг таһагай прокуророор ажалаа. 2002 ондо Улаан-Үдэ хотын Советскэ хороогой хуули сахигшын (прокуророй) орлогшоор хүдэлөө. Удаань, 2003 ондо, хуушан ажалдаа, тэрэл таһагтаа бусаһан байна. 

2004 ондо Буряад Уласай хуули сахидаг зургаанай федеральна хуулинуудай гүйсэдхэлгые хинан шалгадаг таһагай даргын тушаалда томилогдоо. 2009 оной зунай эхин һараһаа Буряад Уласай хуули сахигшын (прокуророй) орлогшоор ажаллана.

«Хуулиин үмэнэ үнэн сэхэ байһанай түлөө» гэһэн III шатын тэмдэгээр, Ородой Холбоото Уласай Юрэнхы хуули сахигшын Хүндэлэлэй бэшэгээр шагнагданхай. “Ородой Холбоото Уласай Хуули сахидаг зургаанай хүндэтэ хүдэлмэрилэгшэ” гэһэн хүндэтэ нэрэ зэргэтэй.