880
Буряад Уласай Толгойлогшын уялга дүүргэгшэ Алексей Цыденов мүнөөдэр, августын 21-дэ, Ярууна аймагай олзын хэрэг эрхилэгшэд, залуушуул болон багшанартай уулзаба.
Уулзалгын үедэ олзын хэрэг эрхилэлгын жасада урьһаламжануудые үгэхэ мүнгэн үгы гэжэ тэдэнэр хэлэбэ. Тиихэдэ Ярууна аймагай залуушуулай засаг зургаан байгуулагданхай гэжэ тэмдэглэбэд.
«Манай залуушуул түрэл нютагаа бусажа, ажабайдалай бүхы һалбаринуудта ажаллана, хүдөө ажахы эрхилнэ. Тэдэнэр байгаали хамгаалгын хэмжээ ябуулгануудые үнгэргэнэ, хүүгэдэй талмайнуудые барина, олзын хэрэг эрхилэгшэд болон спонсорнуудтай ажал ябуулна. Залуушуулнай нютагаа бусажа, ниигэмэй һалбарида ажал ябуулаа һаань дуратайбди. Манай залуу эдэбхитэд жэл бүри грант шүүдэг, харин мүнгэ үгэхэеэ болихо гэжэ һанаата болонобди», - гэжэ залуушуулай засаг газарай түрүүлэгшэ Сарюна Баторова хэлэбэ.
«2018 оной бюджет байгуулхадаа, иимэ конкурснууд үнгэргэгдэхэ гэжэ хараалаабди», - гэжэ Буряад Уласай Спортын болон залуушуулай бодолгын талаар сайдай уялгануудые дүүргэгшэ Баир Ангуров харюусаба.
Олзын хэрэг эрхилэлгэдэ ямар туһаламжа аша үрэтэйб гэжэ уласай хүтэлбэрилэгшэ һонирхобо. Олзын хэрэг эрхилэлгэ дэмжэхэ жасада багахан урьһаламжануудые үгэхэдэ туһатай гэжэ Яруунын олзын хэрэг эрхилэгшэд харюусаба.
«2016-2017 онуудта олзын хэрэг эрхилэгшэдые дэмжэхэ мүнгэн һомологдоогүй. Хүнүүд ехэнхидээ 500 мянганһаа дээшэ урьһаламжа абажа, һөөргэнь заатагүй бусаадаг. Хойто жэл энэ хэрэгтэ мүнгэн һомологдохо гү?», - гэжэ тэдэнэр асууба.
«Энэ жаса хэрэгтэй гэжэ ойлгонобди, тэдхэмжэ үзүүлэгдэхэ. Харин мүнөө бюджет байгуулагдаагүй, тиимэһээ хэлэхэнь эртэ», - гэжэ Алексей Цыденов тэмдэглэбэ.
Модо үйлэдбэрилгэһөө гараһан хибэдэһэн хаанашье хэрэглэгдэнэгүй, тиихэдэ аймагай газар хүдөө ажахы эрхилэлгын удха шанартай гэжэ олзын хэрэг эрхилэгшэд хэлэбэ. Буряад Уласай Байгаалиин нөөсэнүүдэй сайдай уялга дүүргэгшэ Юрий Сафьяновай хэлэһээр, Засагай газарта аймагуудта котельнинуудые хибэдэһээр хэһэн пелледүүдээр түлэгдэдэг болгохо тухай хэлсэгдэнэ. Харин уласай хүтэлбэрилэгшэ пелледүүдые үйлэдбэрилжэ, Хитадта худалдаха тухай дурадхал оруулба.
«Энэ аша үрэтэй ха юм. Хитад гүрэндэ пелледүүдэй сэн ургаа. Тэдэнэр манай уласта энэ үйлэдбэри байгуулха арга боломжо хараална», - гэжэ Буряад Уласай Толгойлогшын уялга дүүргэгшэ хэлэбэ.
Һурагшад хоёр ээлжээндэ һурана, федеральна шэнэ эрилтэнүүдтэ энэ тааранагүй, һургуулинууд баригдаха гү гэжэ багшанар уласай хүтэлбэрилэгшэдэ хандаба. Нэн түрүүн һургуулинуудта гурбадахи ээлжээ болюулха шухала. Хоёрдохи ээлжээндэ һурахаа болёо һаань, хоёр дахин олон һургуулинууд, 3,5 мянган багшанар хэрэгтэй болохо ха юм гэжэ уласай хүтэлбэрилэгшэ хэлэбэ.
Буряад Уласай Толгойлогшын уялга дүүргэгшэ Алексей Цыденов болон Засагай газарай түлөөлэгшэд албанай хэрэгээр Ярууна аймаг гаранхай гэжэ һануулнабди.
Анна Огороднигой гэрэл зураг.
