799
Байгша оной сентябриин 27-һоо ноябриин 3 болотор Москва хотодо үнгэргэгдэхэ бүхэросссиин «Видеть музыку» гэһэн уласхоорондын фестивальда Г. Ц. Цыдынжаповай нэрэмжэтэ Буряадай оперо болон баледэй театр хабаадаха.
Энэ хэмжээ ябуулгада Юрий Лаптевэй найруулһан Джузеппе Вердиин «Бал- маскарад» оперо, Морихиро Иватын бэлдэһэн Бау Ямпилов болон Лев Книпперэй суута «Красавица Ангара» балет Москвада олоной анхаралда табигдаха юм.
Ариунбаатар Ганбаатар, Михаил Пирогов, Самбуу Батчимиг, Билигма Ринчинова болон бусад дуушадай хабаадалгатай «Бал- маскарад» оперо Н. И. Сацай нэрэмжэтэ Хүгжэмтэ театрай тайзан дээрэ октябриин 23-да табигдаха. «Красавица Ангара» балет К.С. Станиславскиин болон Вл.И. Немирович-Данченкын нэрэмжэтэ Москвагай хүгжэмтэ театрта октябриин 24-дэ табигдаха.
«Видеть музыку» гэһэн театрнуудай уласхоорондын форумдо Ородой Холбоото Уласай болон СНГ гүрэнүүдэй эрхим театрнууд хаба шадалаа туршаһан байна. Тиихэдэ эрхим 18 театрнуудай тоодо Буряадай оперо болон баледэй театр энэ фестивальда хоёрдохиёо хабаадаха юм.
– 2016 ондо Большой театрай тайзан дээрэ «Тоска» оперо үндэр амжалтатайгаар табигдаа. Буряадай зүжэгшэд бэлиг шадабарияаа дүүрэн гэршэлжэ, мүнөө жэлэй фестивальда хоёр найруулга харуулха эрхэдэ хүртөөбди, - гэжэ Буряадай оперо болон баледэй театрта мэдээсэбэ.
Буряадай Уласай Соёлой яаманай сайтһаа гэрэл зураг абтаба.
