716
Загарай аймагай Онохой һууринай хоёр дабхар эмнэлгын газарай заһабарилгын ажал дүүрэбэ.
1960-аад ондо баригдаһан байшанда газаа, досоогүй шэнэдхэлгын болон заһабарилгын ажал хэгдэжэ, поликлиникэ танихаар бэшэ болоо. Хуушарһан байшангай хананууд жэгдэлэгдэжэ, шэнэ сонхонууд табигдажа, налгай харгы хэгдэһэн байна. Загарайн түбэй эмнэлгын газарай ахамад эмшэн Олег Очировай хэлэһээр, эмнэлгын түхеэрэлгэнүүд болон эд бараа абалгада уласай бюджетһээ 14 сая 600 мянган түхэриг мүнгэн һомологдоо.
Буряад Уласай Арадай Хуралай Ниигэмэй бодолгын талаар хорооной түрүүлэгшэ Александр Стопичев, Арадай Хуралай Эдэй засагай бодолгын,байгаалиин нөөсэнүүдые ашаглалгын болон оршон тойронхиие хамгаалгын талаар хорооной түрүүлэгшэ Анатолий Кушнарёв болон һунгамал Сергей Леонов үнгэрһэн жэлдэ больницын ажабайдалтай танилсаһан байна. Эмнэлгын газар хуушаржа, харахада голхормоор байгаа гэжэ Анатолий Кушнарёв тэмдэглэбэ.
2017 оной май һарада, эмнэлгын газарай заһабарилгада мүнгэн һомологдохо гэжэ шиидхэбэриин абтахада, барилгашад заһабарилгын ажал эхилжэ, гурбан һарын туршада бүхы хүдэлмэринүүд хэгдэбэ.
«Мүнөө жэл, тэрэнһээ урдашье жэлнүүдтэ Буряад Уласай хүдөө нютагуудта фельдшерско-акушерскэ пунктнууд шэнээр баригдана, заһабарилагдана. Эмшэд болон тэдэндэ хандадаг ажаһуугшад зохид, таатай оршондо байхынь тула ажал ябуулагдана», - гэжэ поликлиникэ нээлгын баяр ёһололдо Элүүрые хамгаалгын сайдай орлогшо Светлана Замбалова хэлэбэ.
Загарай аймагай гулваа Александр Бурлаков түргэн туһаламжын машинын түлхюур Онохойн эмнэлгын газарай хүдэлмэрилэгшэдтэ барюулба.
Онохойдо болон дүтын нютагуудай 17 мянганһаа дээшэ ажаһуугшад энэ поликлиникэдэ хандадаг юм.
