907
Зэдэ аймагай Петропавловка һууринда «Зэдэ аймаг» гэһэн нютагай засагай байгууламжын гулваагай тушаалда Валерий Цыреновэй орохо ёһолол мүнөөдэр, энэ сагта үнгэргэгдэжэ байна.
Аймагай һунгуулиин комиссиин түрүүлэгшэ Николай Дроздов Валерий Цыреновтэ аймагай хүтэлбэрилэгшын үнэмшэлгэ барюулжа, удаань федеральна хуулиин болон аймагай дүримэй ёһоор тушаалда орохо тангаригаа Валерий Цыренов үгэбэ.
Зэдэ аймагай һунгамалнуудай зүблэлэй түрүүлэгшэ Наталья Токарева аймагай засаг зургаанай һүлдэ тэмдэг болохо мүнгэн медаль гулваада барюулба.
Һунгалтын ниитэ нэгэн үдэр, сентябриин 10-да үнгэргэгдэһэн һунгалтын дүнгүүдые аймагай һунгуулиин комиссиин түрүүлэгшэ Николай Дроздов хуулиин ёһоор дуулгаһан байна. Һунгалтада хабаадаһан 10383 ажаһуугшадай 3434 хүниинь Валерий Цыреновэй түлөө дуугаа үгөө. Зэдэ аймагай гулваагай тушаалда долоон хүн зууршалагдаа гэжэ һануулнабди. Һунгалта хуулиин ёһоор үнгэрөө гэжэ һунгуулиин комисси тоолобо.
