718
Буряад Уласай ажаһуугшад улас дотор хэгдэжэ байһан ажал сэгнэбэ гэжэ Толгойлогшын тушаалда һунгагдаһан Алексей Цыденов үнгэрһэн һунгалта тухай Ородой Холбоото Уласай Юрэнхылэгшэ Владмир Путинтай уулзалгын үедэ хэлэбэ.
Уулзалгада хабаадаһан можо нютагуудай хүтэлбэрилэгшэд үнгэргэгдэһэн һунгалта болон ажалай саашанхи түсэбүүд тухай Юрэнхылэгшэтэй хэлсэбэ.
Ородой Холбоото Уласай можо нютагуудай һунгагдаһан хүтэлбэрилэгшэдые Владимир Путин амаршалжа, Юрэнхылэгшын захиргаан болон Засагай газартай аша үрэтэйгөөр ажалаасуг ябуулха тухай хэлэбэ. «Һунгалтын дүнгүүд ехэ һайн. Таанадай олонхинайтнай түлөө ажаһуугшадай 60-һаа дээшэ хубинь дуугаа үгэһэн байна. Олон хүн танда этигэжэ, таанадай түлөө һунгаба. Тиимэһээ танай харюусалгатнай ехэ болоно. Ехэ ажал хэгдээ, тиигэбэшье үшөө хэхэ юумэн ехэ», - гэжэ Юрэнхылэгшэ тэмдэглэбэ.
Владимир Путинай хэлэһэнэй ёһоор, можо нютагуудай хүтэлбэрилэгшэдэй дунда арад зоной дэмжэлгэдэ хүртэһэн залуушуул олон.
«Таанадые байдал хубилгажа шадаха гэжэ арад зон этигэнэ. Залуу, хүсэ шадалтай, мэргэжэнги залуу хүтэлбэрилэгшэ можо нютагуудай ажабайдал һайжаруулха талаар зохихо шиидхэбэринүүдые абаха гэжэ ажаһуугшад найдана», - гэжэ Владимир Путин хэлэбэ.
Ородой Холбоото Уласай можо нютагуудай хүтэлбэрилэгшын тушаалда зууршалагдаһан хүнүүд хэһэн ажалаараа, ажалдаа хандасаараа үндэр тушаалда томилогдоно гэжэ Юрэнхылэгшэ тэмдэглэбэ.
«Можо нютагуудай засаг зургаануудта ажаллаха хүнүүдэй хэн нэгэнэй түрэл гү, али танил гү гэжэ хараха бэшэ, харин тэдэнэй ажалда хандаса, мэргэжэл, арад зоной аша туһада ажал хэжэ шадабари түрүүлэн байха ёһотой. Таанадые иимэ ажал можо нбютагуудта ябуулха гэжэ найданаб», - гэжэ Владимир Путин хэлэһэн байна.
Ниигэмэй һалбаринуудта, элүүрые хамгаалгын, гэр байрын ажахы шэнэдхэлгын, тэрэнэй тоодо Буряад Уласта түймэрһөө хохидоһон нютагата ехэ ажал хэгдээ гэжэ гүрэнэй хүтэлбэрилэгшэ тэмдэглэбэ.
Буряад Уласай Толгойлогшын тушаалда һунгагдаһан Алексей Цыденовэй түлөө ажаһуугшадай 87 хубинь дуугаа үгэһэн байна. Һунгалтада ажаһуугшадай 42 хубинь хабаадаа, энэ тоо нёдондо үнгэргэгдэһэн һунгалтаһаа дээшэ.
«Ажаһуугшадай дэмжэлгэ ехэ. Байдал хубилха гэжэ зон найдажа, хэгдэһэн ажалшье сэгнэбэ. Нэн түрүүн, «Аюулгүй, һайн шанартай харгынууд» гэһэн юрэнхылэгшын түсэл Улаан-Үдэ болон хото шадархи аймагуудта бэелүүлгэ. Тиихэдэ «Болбосон түхэлтэй хотын оршон» гэһэн юрэнхылэгшын түсэл. Тэрэнэй ашаар хотын парк, хангалгын байгууламжануудта хубилалтанууд хэгдэнэ. Ажаһуугшад тэрэниие харана», - гэжэ Алексей Цыденов хэлэбэ.
Буряад Уласай Толгойлогшын уялга дүүргэгшэ Алексей Цыденов федеральна засаг зургаанай дэмжэлгээр, холбоон тухай хуулида оруулагдажа, холо оршодог хүдөө нютагууд түргэн холбоотой интернедтэй болоно гэжэ хэлэбэ.
«200-500 ажаһуугшадтай хүдөө нютагуудта Ростелеком интернет холбоо татана. Эдэй засаг, ниигэмэй һалбари хамтадхан нэгэдүүлхэ зорилготой хэгдэжэ байһан ажал, үсөөн ажаһуугшадтай, холо оршодог нютагуудта ехэ удха шанартай. Эдэ хэмжээ ябуулгануудта федеральна бюджедһээ мүнгэн һомологдоно, иимэ түсэлнүүдые можо нютагууд өөһэдөө бэелүүлжэ шадахагүй», - гэжэ уласай хүтэлбэрилэгшэ тэмдэглэбэ.
Алексей Цыденов түймэрһөө хохидоһон Черёмушки һууринай ажаһуугшадай зүгһөө Владимир Путинда баяр хүргэбэ.
«Таанадай даабари дүүргээбди. Хэлэһэн болзортоо, сентябриин 1 болотор түймэрһөө хохидогшодые гэртэй болгожо, мүнгэн тэдхэмжэ үзүүлһэн байнабди. Хүнүүд энэ ажал сэгнэнэ», - гэжэ тэрэ тэмдэглэбэ.
Ерээдүйдэ хэхэ ажалда найдалтай энэ ехэ дэмжэлгэ үзүүлэгдэбэ. Тэрэнэй харюусалга дүүрэн ойлогоноб. Хүнүүдэй этигэл, найдал бэелүүлхэ талаар оролдохобди гэжэ Алексей Цыденов хэлэбэ.
Алексей Цыденовһээ гадуур Юрэнхылэгшэтэй уулзалгада Адыгея уласай Толгойлогшо - Мурат Кумпилов, Мордовиин - Владимир Волков, Удмуртиин - Александр Бречалов, тиихэдэ можо нютагай хүтэлбэрилэгшын тушаада ороодүй Карелия уласай Артур Парфенчиков болон Марий Эл уласай Александр Евстифеев, Белгородой можын губернатор - Евгений Савченко, Кировой можын - Игорь Васильев, Рязань можын - Николай Любимов, Свердловск можын - Евгений Куйвашев, Томск можын - Сергей Жвачкин, Ярославска можын - Дмитрий Миронов болон можо нютагуудай толгойлогшын уялга дүүргэгшэ Калининград ай можын - Антон Алиханов, Новгород можын - Андрей Никитин, Саратов можын - Валерий Радаев, Пермь хизаарай толгойлогшо Максим Решетников болон Севастополь хотын - Дмитрий Овсянников гэгшэд хабаадаа.
