882
Александр Раднаевич Гармаев. 1966 он.
Бархан баабайгаа түшэһэн Баргажанай домогто Баян-Голой сууда гараһан Карл Марксай нэрэмжэтэ колхозой байгуулагдаһаар 90 жэлэйнь ехэ ой гүйсэжэ байна. Мүн баһал Карл Марксай түрэһөөр 200 жэлэй ой гүйсэхэ дүтэлөө.Баргажан голой ажалша малша хүдэр зоной (Буряад соогоо “марксистнууд” гэжэ алдаршаһан) эсэшэ сусашагүй ажалай ашаар Карл Марксын нэрэмжэтэ колхоз бүхы Зүблэлтэ орон соогуураа суурхажа, колхоз-миллионер болоһон баян түүхэтэй. Энэ колхозой нэрэ солодо механизатор Александр Раднаевич Гармаевай нэтэрүү ажалаараа оруулһан хубита баһал ехэ. Эсэгэ ороноо хамгаалгын Агууехэ дайнай хатуу шэрүүн үедэ 14-тэйхэн хүбүүн эрэшүүлэй хэдэг бүхы ажалнуудые хэжэ гараа. Наһаяа хүсэд гүйсэхэдэнь, колхозой адуу даалгажа, Хара-Уһанда дүрбэн жэл соо адуушанаар хүдэлөө. 1960 ондо ажалша бэрхэ Александрые тракторист-механизаторай һургуулида эльгээбэ. Тэрэ гэһэнһээ хойшо Александр Раднаевич түмэр хүлэгтэеэ хахасалтагүй хамтын ажалда үнэн шударгыгаар ажаллаа. Түмэр хүлэгтэ мордоол һаа, жолоо даражал ябаа бэшэ. Алтан таряа ехээр ургуулжа, баян ургаса абахадаа, Александр Раднаевичай ударидадаг механизированнэ звено газараа хахалха, орооһо тариха, уһалха, хараха ажалые эхинһээнь захадань хүрэтэр жэншэдгүй ябуулха. Мүн баһа үбһэ хуряахадаашье, Жаргаланта гэжэ үнэхөөр жаргаланта голдо тэдэ 320 гектар талмай сабшаланһаа хэнһээшье үлүү үбһэ бэлдэдэг һэн. Бултанда хүндэтэй Александр Раднаевичай үргэн сээжэдэ Ажалай Улаан Тугай орден, олон медальнууд, “Ударнигай”, “Отличнигай” тэмдэгүүд ялардаг. Алдарта ажалынь гүрэн түрэ үндэрөөр сэгнэжэ, “Буряадай АССР-эй габьяата механизатор”, “Россиин Федерациин хүдөө ажахын габьяата механизатор” гэһэн үндэр нэрэ зэргэнүүдые олгоһон юм.
Радна Галзутович (1907 оной) Чингис ашатаяа
Сэсэг Очировна (1910 оной) Наташа ашатаяа
Александр Раднаевич, Раиса Сынгеевна гэр бүлөөрөө.
Эсэгынгээ үбэр дээрэ - Игорь, эхынгээ үбэртэ - Ирина, эхэ эсэгынгээ дунда – Дима, Цырма Санжиевнагай үбэр дээрэ – Женя. 1967 он.
Аха дүүнэр: Раднажаб – бригадир-механик, Вячеслав – адуушан, Валерий – хонишон, Елизавета – хонишон, Александр– механизатор, Владимир – жолоошон, Зинаида – медсестра, Цыденжаб – зоотехник.
“Баргажанай үнэн” сониной сурбалжалагша Сергей Потхоевтой. 1989 он.
Цыденжаб Володя ахынгаа Чингистэй, Александр ахынгаа Тамаратай. 1974 он.
Эбтэй эетэй Мөөдөөнтэн. 1984 он.
Үбһэ хуряалгын үедэ. Зүүн гарһаа байнад: Гармаев Александр, Пирнанов Жаргал, Линхоев Михаил, тракторта Абашеев Юра һууна. 1977 он.
Зүүн гарһаа: Михайлов Коля, Эрдыниев Бадма, Путушкин Володя, Гармаев Александр. 1958 он.
ВДНХ. 1980 он.
Мөөдөөнтэн эбтэй эетэйгээр ойн баярнуудаа угтадаг.
Автор: Аркадий БАТОМУНКУЕВ
