771
«Ородой Холбоото Уласай эрхим багша - 2017» гэһэн бүхыроссиин мүрысөөнэй федеральна шатын нээлгын баяр ёһолол октябриин 24-дэ Сочи хотын Зимний театрта үнгэрөө.
Ородой Холбооной 85 можо нютагуудай эрхим багшанар энэ мүрысөөндэ хабаадана. Тэдэнэй тоодо, Буряад Уласай Улаан-Үдэ хотын 35-дахи һургуулиин эхин классуудай багша - Елена Бурдукова. Елена Бурдукова 2017 оной хабар «Буряад Уласай эрхим багша -2017» гэһэн уласай мүрысөөндэ түрүүлээ гэжэ һануулнабди.
Сочи хотодо Олимпиадада бэлэдхэлэй үедэ баригдаһан, мүнөө үеын эрилтэнүүдтэ таараһан 100-дахи һургуулида багшанар мүрысэхэ. Хоёр долоон хоногой туршада багшанар дүй дүршэлөө, бэлиг шадабарияа жюриин гэшүүдтэ харуулха юм. Мүрысөөнэй дүнгүүд октябриин 3-да согсологдожо, табан эрхимүүд Москва хото түгэсхэлэй шатада хабаадахаяа ошохо юм.
«Ородой Холбоото Уласай эрхим багша - 2017» гэһэн мүрысөөндэ илагшын нэрэ багшанарай һайндэрэй урда Кремльдэ соносхогдохо.
Буряад Уласаа түлөөлһэн Елена Бурдуковае Буряад Уласай Болбосоролой болон эрдэм ухаанай сайдай уялга дүүргэгшэ Баир Жалсанов, «Буряад Уласай Багша» гэһэн уласай олониитын эмхиин залан хүтэлбэрилэгшэ Елена Цыдыпова гэгшэд дэмжэхэеэ ошонхой.
Энэ мүрысөөнтэй хамта Сочи хотодо Болбосоролой бүхэроссиин профсоюзай хабаадалгатай Болбосоролой һалбарида гүйсэдхэхы засаг зургаанай хүтэлбэрилэгшэдэй бүхэроссиин зүблөөн үнгэргэгдэнэ. Энэ хэмжээ ябуулгада Баир Жалсанов хабаадаана.
Буряад Уласай Болбосоролой болон эрдэм ухаанай яаманһаа гэрэл зураг абтаба.
