​Ээлжээтэ сессиин эршэтэй ажал

Буряад Уласай Арадай Хуралай ээлжээтэ хорин табадахи сесси ниислэл хотодо зарлагдажа, уласай парламентын ехэ танхим соо үсэгэлдэр үнгэргэгдэбэ. 

Тус зүблөөндэ хабаадалсаһан жаран нэгэн һунгамал дүшэн асуудал зүбшэн хэлсэһэн байха юм. Урда тээнь уласай парламентын бүхы хороонууд хэдэн зүблөөнүүдые үнгэргэжэ, Арадай Хуралай ээлжээтэ сесси дээрээ зүбшэн хэлсэхэ асуудалнуудаар һанамжаяа элирхэйлэнхэй байгаа. Тиимэһээ нэгэ үдэрэй туршада боложо үнгэрһэн энэ сессиин ажал эршэтэй байгаа гэбэл, алдуу болохогүй. 

Һайн дураараа, 

болзорһоо урид 

Эгээл түрүүн Арадай Хуралай һунгамал Валерий Назаровай һайн дураараа эрхэ түлөөлэлгэнүүдээ болзорһоо урид болюулха тухайгаа бариһан мэдүүлгэнь парламентын үзэмжэдэ табигдажа, гуйлтань дүүргэгдээ. Энэ ушарааар болзорһоо урид болиһон һунгамалай “Ниитэ нэгэ Росси” гэһэн намай уласай хойто аймагуудай дэбисхэртэ бүридхэһэн тобьёгоор һунгагдаһан хадань, тэрэ тобьёг соо удаадахи хүниинь арадай һунгамалай эрхэ түлөөлэлгэтэй болохо юм. 

Засаг бариһан намай Буряад Уластахи нютаг можын дарга Владимир Павловай хэлэһэнэй ёһоор, һаяын үдэрнүүдтэ энэ асуудал зүбшэн хэлсэгдэхэ юм. Хууляар хараалагдаһан ёһо гурим сахигдажа, намай түб зургаанууд зүбшөөлөө үгэхэ ёһотой. Удаань хэрэгтэй хамаг дансанууд бэлдэгдэжэ, уласай һунгуулиин комисси руу ябуулагдаха. Тиин энэ гуримай түргэн шууд дүүргэгдээ һаа, удаадахи, октябриин 10-да зарлагдаһан ээлжээтэ бэшэ сесси дээрэ сүлөөрһэн мандат эзэтэй болохоор багсаамжалагдана. 

Валерий Назаровай удаа Хойто-Байгалай болон Муяын аймагуудай дэбисхэрһээ бэлдэгдэһэн тобьёгто Иннокентий Егоров ородог. Уласай Засагай газарта Түрүүлэгшын Нэгэдэхи орлогшын гүрэнэй тушаалһаа буухада, Арадай Хуралай һунгамалай мандадтай болохо эрхэ Иннокентий Егоровто олгогдонхой гэжэ онсолон тэмдэглэхээр. 

Эхин шатын шүүгшэд томилогдоо 

Эхин шатын шүүгшэдые (мировой судьянарые) хуулиин ёһоор уласай парламент тушаалдань томилдог. Арадай Хуралай үзэмжэдэ тэдэнэй кандидатурануудые табихын урда тээ уласай Верховно Сүүд бэлдэлгын горитой ажал ябуулдаг гээшэ. Шүүгшэдэй мэргэжэлтэ комиссиин урда тусхай шалгалта барижа, бүхы талаһаа шалгагдаһанайнгаал удаа шүүгшэ болохо (судья) дуратайшуул һунгамалнуудай урда гарадаг ёһо гуримтай. 

Энэ удаа Буряад Уласай Верховно Сүүдэй Түрүүлэгшэ Альбина Кириллова Улаан-Үдэ хотын хороонуудай болон зарим хүдөө аймагуудай шүүлгын хэлтэсүүдэй эхин шатын шүүгшэдэй тушаалнуудта Лариса Аюшеева, Инна Григорьева, Сэсэг Дашинимаева, Ольга Макарова, Антон Орлов, Евгения Павлова, Анна Раднаева, Людмила Сахинова гэгшэдые дурадхаһан байха юм. Буряад Уласай Арадай Хуралай һунгамалнууд тэдэнэй түлөө дуугаа үгэжэ, табан жэлэй болзороор эхин шатын шүүгшэд тушаалнуудаа эзэлхэ эрхэдэ хүртөө.

Тоололгын танхимда – түрүүлэгшын шэнэ орлогшо 

Буряад Уласай Тоололгын танхимай түрүүлэгшын орлогшын тушаалда Михаил Егоров томилогдобо. Анхан эндэ ажаллажа байһан Владимир Гарматаров наһанайнгаа амаралтада гаража, үнгэрһэн һарын эсэстэ тушаалаа сүлөөлһэн байгаа. Нюусаар дуугаа үгэһэнэй дүнгүүдээр сессидэ хабаадаһан диилэнхи олон һунгамал – 42 хүн – тэрэнэй түлөө һунгажа, дурадхагдаһан дарга тушаалдаа томилогдоо.

Тоололгын танхимай нэгэ аудиторай тушаал үни хада сүлөөрэнхэй юм. Теэд хэдэн сессиин туршада хэрэгтэй диилэнхи хуби дуун хэнэйшье түлөө үгтөөгүй һэн гээд һануулая. Һунгамалнууд энэ сессиин үзэмжэдэ дурадхагдаһан хоёр хүн сооһоо шэлэжэ, аудиторай тушаалда Татьяна Цыдыповае томилбо. Тэрэнэй түлөө 34 һунгамал дуугаа үгэһэн байха юм. 

Шухала асуудалнуудые шууд шиидхэхэ 

Ээлжээтэ энэ сессиин үзэмжэдэ табигдаһан олон тоото асуудалнуудаар хуулита шиидхэбэринүүд абтаа, зарим зүйлнүүдээр парламентын тогтоолнууд баталагдаа. Удаадахи дугаарнуудтаа болон www.burunen.ru сайт дээрээ манай сурбалжалагшадай энэ зүблөөнһөө бэлдэһэн материалнуудые толилжо, уншагша олонойгоо һонорто дурадхахабди.