​Зөөриин налог түлэхэ болзорые августын 1-дэ болгохые Арадай Хурал дурадхана

Энээн тухай Буряад Ула­сай Арадай Хуралай Бюджедэй, налогуудай ба сан жасын хо­рооной түрүүлэгшэ Зоригто Цыбикмитов Ородой Хол­боото Уласай Федеральна Суглаанай Федерациин Со­ведэй Бюджедэй ба мүнгэн зөөриин дэлгүүрэй талаар хорооной зүблөөн дээрэ мэдүүлээ.

Һунгамалай һанамжаар, хуулида зохистой хубилалта­нуудые оруулбал, налог тата­бариин хэмжээн дээшэлжэ, уласай ба нютагай байгуулам­жануудай һанда һайн нүлөө үзүүлхэ һэн. 2016 онһоо ажаһуугшадай зөөриин налог түлэхэ болзор октябриин 1-һээ декабриин 1-дэ болгогдожо, хоёр һараар хойшолуулагдаа.

«Теэд болзор хубилгаһан ушарһаа налог татабари суглуул­ха саг нилээд бага болоод, налог түлэгшэдэй үри шэрэ ургаа. Тиигэжэ 2016 ондо бидэ налогоо 88 сая түхэригөөр дутуу суглуулаабди. 2015 онойхитой сасуулхада, суглуулагдаагүй нало­гой хэмжээн 27 хубяар дээшэлээ,” – гэжэ Зоригто Цыбикмитов ойлгуулаа.

Хэрбэеэ 2016 он болотор налог татагшадта түлбэри оруулаагүй хүнүүд тушаа зохистой хэмжээ абахын тула гурбан һара үгтэдэг һаа, мүнөө оройдоо нэгэ һара хараа­лагдана гээшэ. Гүрэнэймнай Бюджедэй кодексын ёһоор, ажаһуугшадай газарай ба зөөриин налогууд имагтал нюта­гай бюджедүүдтэ оруулагдадаг. Тиихэлээрээ эдэ налогуудай ехэнхинь, илангаяа унаагай хэрэгсэлэй налог, жэлэй эсэстэл бюджедүүдтэ ороно. Бүхыдөө 2016 ондо Буряадай нюта­гай засагай байгууламжануудай налог татабариин олзо оршонуудай хуби 6 процент бүридхөө. Харин унаа тээбэриин налогой хуби Буряадай Харгын жасын 10 процентһээ дээшэ гараагүй.

«Иимэ эрхэ байдалда нютагай засагай байгууламжануу­дай бүрин этигэмжэнүүдээ бэелүүлхэ арга боломжонуудынь хизаарлагдана, мүн уласай хамтаруулагдамал бюжет болон Харгын жаса тэгшэ бэшээр дүүрэнэ”, - гэжэ Арадай Хуралай һунгамал тайлбарилаа.

Мүнөө Гүрэнэй Дүүмын үзэмжэдэ зөөриин налог түлэхэ болзор хубилгаха асуудалда зорюулагдаһан гурбан дурад­хал оруулагданхай. Налог татабариин кодексто хубилалта оруулха тухай дурадхал Вологодско ба Тамбовско можо­нуудай парламентнууд оруулаа, тиихэдэ Гүрэнэй Дүүмын һунгамалнууд федеральна хуули хубилгаха үүсхэл гаргаа юм. Зүгөөр гансал Вологодско можын һунгамалнуудай түлэб зүбшөөгдөө: налог түлэхэ болзор хубилгабал, үнэхөөрөө, можо нютагуудай һанда аша туһатай байха гэһэн тобшолол хэгдээ.

Зоригто Цыбикмитовэй хэлэһээр, иимэл шиидхэбэри 2017 оной октябрь соо Буряадай бүхы шатын һунгамалнуудай IV съезд дээрэ абтаа һэн.

«Энэ съезд дээрэ амин шухала асуудалнууд, тэрэ тоодо на­лог түлэхэ болзор эртүүр болгохо тухай хэлсэгдээ. Тус дурадхал нэгэн дуугаар дэмжэгдэжэ, съездын шиидхэбэринүүдэй тоодо оруулагдаа. Тиимэһээ бидэ сенаторнуудта Вологодско можын хуулиин түлэб дэмжэхыень, зүгөөр зөөриин налог түлэхэ саада захын болзорые тэдэнэй хараалһан октябриин 1-дэ бэшэ, ха­рин августын 1-дэ болгохыень дурадханабди”, - гэжэ Зоригто Цыбикмитов хэлээ.

Татьяна БАЖЕНОВА, Дыжид МАРХАДАЕВА 

Ородой Холбоото Уласай Федерациин Зүблэлэй мэдээсэлэй албанай гэрэл зураг