743
Ородой Холбоото Уласай байгаалиин нөөсэнүүдэй сайд Сергей Донскойн хэлэһэнэй ёһоор, Байгал сахин харууһалха программа – хүгжэлтын шухала зүйлнүүдэй нэгэн, тэрэ программа 2030 он болотор бэелүүлэгдэхэ ёһотой.
Тиихэдэ 2018 ондо программын түрүүлэн бэелүүлэгдэхэ обьектнүүдэй түсэлнүүдтэ нэмэлтэ мүнгэн һомологдохо. Можо нютагууд табигдаһан зорилгонуудые хэр зэргэ бэелүүлнэб, тэрээнһээ мүнгэ һомололго дулдыдаха.
«Байгаали хамгаалгын түб газарнуудта түсэлнүүдые бэелүүлгэдэ мүнгэн тэдхэмжэ онсолон үзүүлэгдэхэ. Эдэ бүгэдэ программын түрүүлэн хэгдэхэ хэмжээ ябуулгануудта хабаатай байха. Хэр зэргэ ажал ябуулагданаб, тэрэнһээ олон юумэн дулдыдаха. Мүнөө адаглахада, ажал тиимэ урагшатай хэгдэнэгүй, тиимэһээ кадрова шиидхэбэринүүд абтаха», - гэжэ сайд тэмдэглэбэ.
2017 оной август һарада Кабанск аймагай Танхой һууринда Байгалай хизаар хүгжөөхэ тухай зүблөөн Ородой Холбоото Уласай Юрэнхылэгшэ Владимир Путинай хабаадалгатай үнгэргэгдөө гэжэ һануулнабди. Тэрэнэй дүнгүүдээр Владимир Путин Буряад Уласай Засагай газарта даабаринуудые үгэһэн байна. Буряад Уласай Толгойлогшо Алексей Цыденов Байгалай хизаарта ородог дүрбэн аймагай 71 һууринуудта газар хубаалгын ажалнууд хэгдээ гэжэ хэлэбэ. Газар хубаалгын ажал хэгдэһэнэй ашаар, ажаһуугшад эзэлжэ байһан газар болон гэрнүүдээ хуулиин дансатай болгожо, тэрээн тухай мэдээсэл хүдэлэсэгүй зөөриин гүрэнэй ниитэ нэгэ реестртэ бүридхэлдэ оруулагдаа. Тиигэбэшье энэ талаар ажал үшөөл ябуулагдаһаар гэжэ уласай хүтэлбэрилэгшэ тэмдэглэбэ.
«Зарим хэды шалтагаанһаа боложо, энэ талаар ажал удаашарна. Нэгэдэхеэр, һууринууд ойн жасын газарта оршоно, ойн жасын газарнуудые һууринуудай мэдэлдэ болгохо талаар хорюул. Хоёрдохёор, Байгаали хамгаалгын түб газарта оршодог һууринуудта ЮНЕСКО эмхиин хизаарлалта. Гурбадахяар, байгаалиин онсо харууһатай газарнууд – тэрэнэй талмай бага болгохо хорюул», - гэжэ Буряад Уласай Толгойлогшо тэмдэглэбэ.
Ородой Холбоото Уласай Засагай газарта «Байгал далай сахин харуһалга тухай» болон «Онсо харууһатай байгаалиин газарнууд тухай» гэһэн федеральна хуулинуудта хубилалтануудые оруулха тухай хандалга эльгээгдэһэн байна.
«Хилэ тэмдэглэгдээгүй 11 һууринуудай талаар газарай кодексдо хубилалтанууд оруулагдажа, зохихо шиидхэбэр абтабал, жэлэй дүүрэтэр ажал хэгдэхэ гэжэ найданабди», - гэжэ Алексей Цыденов хэлэбэ.
Тиихэдэ Буряад Уласай Толгойлогшо Гусиноозерскын зайн галай станциин үйлэдбэрилһэн зайн гал Монгол гүрэндэ дамжуулха тухай хэлэһэн байна.
«Энэ асуудалаар Монгол гүрэнэй түлөөлэгшэдтэй, Ородой Холбоото Уласай байгаалиин нөөсэнүүдэй яамантай хэлсэһэн байнабди. Хоёр долоон хоногой саана Монголой юрэнхылэгшэтэй уулзааб. Монгол гүрэндэ зайн гал дамжуулга ГЭС бариһанһаа ашаг үрэтэй гэжэ Монголой түлөөлэгшэд зүбшэбэ. Энэ асуудалаар ажалай бүлэг Монгол гүрэнтэй суг байгуулжа, тоололго үнгэргэхэ тухай шиидхэбэри абтаа», - гэжэ уласай хүтэдлбэрилэгшэ тэмдэглэбэ.
Ородой Холбоото Уласай байгаалиин нөөсэнүүдэй сайд Сергей Донской зүблөөнэй дүнгүүдые согсолжо, юрэнхылэгшын даабаринууд дүүргэгдэнэ гэжэ тэмдэглэбэ.
«Юрэнхылэгшын даабаринуудые саг соонь дүүргэхэ талаар ажалаа ябуулха тухай суг хүдэлдэг нүхэдтөө ханданаб. Табигдаһан зорилгонуудые болзортоо дүүргэхэ шухала. Федеральна программанууд можо нютагуудай хүгжэлтэдэ аша үрэтэй бэелүүлэгдэхэ ёһотой. Мүнөө хэлсэгдэһэн Байгалай экологическа системэ аршалха тухай асуудалнуудаар ниигэмэй-эдэй засагай хүгжэлтэдэ һаадгүйгөөр ажал ябуулха шухала», - гэжэ сайд хэлэбэ.
