881
Улаан-Үдын авиазаводто ТВС-2ДТС түхэлэй самолёт бүтээхэ тухай хэлсээн Буряадай ниислэл хотодо үнгэрбэ. Энэ хэмжээ ябуулгада Буряад Уласай Толгойлогшо Алексей Цыденов, «Вертолёты России» холдингын юрэнхы захирал Андрей Богинский, С.А. Чаплыгинай нэрэмжэтэ Сибириин эрдэм-шэнжэлгын институдай түлөөлэгшэд болон видеохолбоогоор Саха (Яхад) уласай Засагай газар хабаадаһан байна.
- Бидэ энэ түхэлэй самолёт бүтээхэ түсэлэй харгын карта хараабди. Ородой Холбоото Уласай Юрэнхылэгшэ Владимир Путин даабаряар энэ түсэл урагшатай бэелүүлэгдэжэ эхилээ. Тиимэһээ һаяын сагта түсэл бэелүүлэгдэхэ гэжэ найданабди, - гэжэ Алексей Цыденов хэлэбэ.
Байгша оной февралиин 15-16-най үдэрнүүдтэ Сочи хотодо хүрэнгэ зөөри оруулха хуралдаанда Ородой Холбоото Уласай транспортын, үйлэдбэриин яаманууд, Буряад болон Яхад уласуудай Засагай газарнууд, хуби ниилүүлһэн «Вертолеты России» бүлгэм хуушанай Ан-2 түхэлэй самолёт һэлгэхэ ТВС-2ДТС түхэлэй самолёт бүтээхэ тухай хэлсээ баталһан байна гэжэ һануулнабди.
Буряад Уласай Толгойлогшын хэлэһээр, Улаан-Үдын авиазаводто байгша оной апрель һарада ТВС-2ДТС түхэлэй самолёт бүтээжэ эхилхэ гэжэ түсэблэгдэнэ. Тиимэһээ Буряад болон Яхад уласууд шэнэ самолёдуудые дамжуулха тухай хэлсээ баталха юм.
- Шэнэ самолёт бүтээжэ эхилхэдээ, ажалай һууринууд, татабари дээшэлүүлэгдэхэ, авиазавод таһалгаряагүй ажалаа ябуулха бата найдалтай болоно. Самолёт ганса суглуулха болоо һаа, үйлэдбэриин оройдоо 5000 час болохо. Харин бидэ бүхы ажал даажа абаха хүсэлтэйбди. Энэ ажал даажа абабал, Байгал далайда тамарха бага онгосонуудые бүтээхэбди, Зүүн Сибириин технологиин болон хүтэлбэриин гүрэнэй ехэ һургуулиин авиацииин кафедрада мэргэжэлтэдые бэлдэхэбди, шэнжэлгэ хэхэ хэрэгсэлнүүдые бүтээдэг приборостроительна нэгэдэл ажалаар хангагдаха. Энэ түсэлэй ашаар олон юумэн хэгдэхэ, - гэжэ уласай хүтэлбэрилэгшэ Алексей Цыденов хэлэбэ.
«Вертолёты России» холдингын юрэнхы захирал Андрей Богинскиин хэлэһээр, Улаан-Үдын авизаводто жэлэй 24-һөө бага бэшэ ТВС-2ДТС түхэлэй самолёт бүтээхээр түсэблэгдэнэ. 2021 онһоо 2025 он болотор 200-гаад самолёт бүтээн гаргахаар түсэблэгдэнэ.
Мэдээсэл
Ан-2 түхэлэй самолёдой баазада үндэһэлэн бүтээгдэһэн ТВС-2ДТС түхэлэй самолёт мүнөө үеын онол аргануудай хүсөөр ямаршье уларилда, үдэр һүни илгаагүй ашаглагдаха аргатай. Энэ түхэлэй самолёт Носвосибирск хотын Сибириин эрдэм-шэнжэлгын институдта зохёон бүтээгдэһэн байна. ТВС-2ДТС түхэлэй самолёдой хурдан - часай 350 модо, тэрэ 3,5 тонно ашаа тээхэ аргатай.
Буряад Уласай Засагай газарай хэблэлэй албанай гэрэл зураг
