Ородой Холбоото Уласай Засагай газар заатагүй шэнэлэгдэхэ гэһэн һураг суу тараһан байгаа. Гэбэшье майн 18-да гүрэнэй толгойлогшо Владимир Путинай баталһан зарлиг тэрэнэй үнэн байһые гэршэлбэ. Засагай газарай ударидагшаар Дмитрий Медведевэй үлэбэшье, 10 орлогшоноройнь болон 22 сайдуудай дунда шэнэ нэрэнүүд бии. Тиимэһээ шэнээр бүридхэгдэһэн Засагай газар урдань табигдаһан зорилгонуудаа бодотоор бэелүүлхэ гэжэ найдабари түрэнэ.
Үндэр туйлалтатай ударидагшад
Илангаяа федеральна хэмжээнэй Засагай газарай бүридэлдэ нютаг можонуудые амжалтатайгаар хүтэлбэрилһэн толгойлогшонорой ороһониие экспертнүүд үндэрөөр сэгнэнэ. Амарай можые ударидагша Александр Козлов Дурна зүг хүгжөөлгын яаманиие даажа абаба. Тюмениин можын Толгойлогшо байһан Владимир Якушев Барилгын яаман ударидаба. Тиихэдэ Байгаалиин яаман Ямало- Ненецкэ тойрогой Толгойлогшо байһан Дмитрий Кобылкинда даалгагдаа. Үндэр туйлалтануудтай эгээл бэрхэ ударидагшад иигэжэ дээшээ дэбжүүлэгдэбэ гээшэ. Регионуудые толгойлһон бусадта ургалтын жэшээ харуулагдаба гэхэдэ болоно. Тиибэшье эдэ зоной саашанхи ажал хэрэг саг харуулхал аабза, юундэб гэхэдэ, балайшье бэлэн бэшэ - бэрхэшээл ехэтэй һалбаринуудай түлөө харюусаха болобо ха юм. ФСБ-гэй секретарь, Ородой Холбоото Уласай Герой Николай Патрушевай үри хүбүүн Дмитрий Хүдөө ажахын яаман толгойлбо. Энэ хадаа хүлеэгдээгүй томилолто. Гэбэшье Дмитрий Патрушев урид Россельхозбанк хүтэлбэрилжэ байгаа ха юм. Тиимэһээ хүдөө ажахын һалбариин олзо оршо, гаргаша гэхэ мэтые бодотоор мэдэдэгынь ойлгосотой. Нүгөө талаараа гүрэнэй хүтэлбэридэ дүршэлөө үеһөө үедэ дамжуулха ушарнуудай бии боложо байһаниие дэмжэхэ хэрэгтэй гээд, шүүмжэлэгшэд багсаамжална.
Найдабари ехэтэй тушаалтад
Засагай газарай шэнэ бүридэл урдахиһаа үлүү ехэ илгаагүй. Засагай газарай орлогшонорто орходоо, нилээд олон сайдууд һэлгэгдээ. Гэбэшье зуунай 70 хубинь анханайнгаа тушаал алдаагүй. Энэнь баһал зүб. Юундэб гэхэдэ, ажалаа мэдэхэ, дүршэлтэй зон – найдабаритай. Теэд эрилтэшье ехэ байха гээд хүлеэгдэнэ.
Һүүлэй 10-15 жэлдэ гүрэнэй хүтэлбэридэ үндэр тушаалнуудта ябаһан зон Засагай газарай Толгойлогшын орлогшоор томилогдоо. Нэгэдэхи орлогшо – мүнгэн һангай сайд болоһон Антон Силуанов Владимир Путинай майн зарлигуудые бэелүүлхэ хэрэгтэ һомологдоһон мүнгэ зүбөөр хубаажа шадаха гээд, олонхи зон найдана. Социальна һалбариин түлөө Татьяна Голикова харюусаха. Үйлэдбэриин ба элшэ хүсэнэй hалбариие Дмитрий Козак даан абана. Барилгын һалбари – Виталий Мутко, Соёлой, тамирай болон аяншалгын һалбари Ольга Голодец ударидаха. Дурна зүг хүгжөөлгын түлөө Юрий Трутнев харюусаха. Ашаанай тээбэриин, хэлхеэ холбоон Максим Акимовта, гүрэнэй засагай хүтэлбэри Константин Чуйченкодо, хүдөө ажахы Алексей Гордеевтэ, сэрэгэй-үйлэдбэриин тала Юрий Борисовта даалгагдаа.
Мединский, Васильева, Скворцова гэгшэд ажалаа һайн мэдэхэ зон. Социальна һалбариин түлөө һанаата болохоор бэшэ. Тиихэдэ Шойгу, Колокольцев, Лавров гэгшэд мүн лэ дүршэл ехэтэй улад мүн. Аюулгүйе хамгаалга мүн лэ найдамтай зоной ударидалга доро гээд, шүүмжэлэгшэд тэмдэглэнэ. Шалгалта гараһан шанга уладаа яагаад һэлгэхэб даа! Тиибэшье Засагай газарта шэнэ нэрэнүүд байна. Тэдэн хүтэлбэрилхы дүршэлтэй гээд мэдэбэбди.
Дмитрий Патрушев тухай тобшо мэдээ
4О наһатай. Санкт-Петербургын ехэ һургуули түгэсхөө. Мэргэжэлээрээ - менеджер. ФСБ – гэй һургуули дүүргэһэн. Эдэй засаг шэнжэлэлгын эрдэмэй кандидат, «Газпромой” хубиин эзэн, «Россельхозбанк» гэһэн бүлгэмэй түрүүлэгшэ.
Тиихэдэ Ородой Холбоото Уласай Болбосоролой болон эрдэм ухаанай яаман хоёр боложо хубаараа. Хэрбэеэ Гэгээрэлэй яаман Ольга Васильевада даалгагдаа һаа, Эрдэм ухаанай болон дээдэ һуралсалай шэнэ яаманиие Эрдэм ухаанай эмхинүүдэй федеральна хэлтэсэй захирал Михаил Котюков ударидаба. Тиимэһээ Россиин эрдэмэй академидэ эхилһэн хубилалтанууд үргэлжэлхэ. Энээнһээ бэшэ горитой ехэ шэнэлэлтэ харагданагүй.