928
Буряад уласай засагай газарай хэблэлэй албанай гэрэл зураг
Байгша оной июниин 21-дэ, Буряад уласта Түнхэн аймагта 17-дохи уласай Хүдөөгэй Нааданууд эхилбэ. Хэмжээ ябуулгын баяр ёһололые Буряад уласай толгойлогшо Алексей Цыденов нээбэ.
«Спортын иимэ һайхан һайндэрөөр амаршалнаб! Иишээ, аятай зохид Түнхэнэй газар уласай бүхы аймагуудһаа хабаадагшад буужа, туйлалтануудаа харуулха хүсэлтэй. Бүгэдэ буряадай нэгэн ниитэ хүсэн байһанаа харуулна. Бидэ тэмсэнэбди. Эгээл хүсэтэймнай илажа гараг. Тэрэмнай уласай бүлэгэй хүсэн ха юм. Спортменгүүдтэ улам гоё барилдаа хүсэе. Харагшадта спортсменгүүдээр омогорхон, баяр баясхалантай байхыень хүсэе. Энэ һайндэр бидэниие спортоор бэе һорижо байхыемнай дэмжэнэ”, - гээд уласай толгойлогшо тэмдэглээ.
Алексей Цыденов нютагай зондо баярые хүргэбэ. Тэдэнэрэй олонхи зониинь Нааданай бэлдэлгэдэ ба ябуулгада хабаадалсаа.
“Түнхэн аймагай ажаһуугшадта хэһэн ажалайнь түлөө баярые хүргэнэб. Иимэ үндэр хэмжээн дээрэ Нааданай боложо байһанайнь тула. Би мэдэнэб, аймаг бүхы сэдьхэлээрээ Наада хүрэмөөр үнгэргэхэеэ хүдэлһэн байна”.
“Засагай газарай спорт болон физическа культура хүгжөөхэ талаар ехэ ажал ябуулжа байһан тухай" Буряад уласай толгойлогшо нэмэбэ.
“Бидэ спортдо анхаралаа хандуулнабди. Энэ жэл 600 сая түхэриг уласай бюджетһээ спортдо дамжуулагдаа. Тэрэ 2017 онойхиһоо 10 процентээр ехэ. Бидэ Мүльһэн ордонтой, хаамал һур харбалгын газартай болохын түлөө, аймаг дотор шэнэ бодхолгонуудай ба спортзалнуудай бии болохын түлөө ехэ оролдонобди, ехэ ажал хэнэбди”, - гээд Алексей Цыденов хэлээ.
Һайндэрэй баяр ёһолол нээлгэндэ Ород Уласай спортын яаманай департаментын захирал Александр Росляков, Арадай Хуралай түрүүлэгшэ Цырен-Даши Доржиев, Түнхэн аймагай засаг дарга Иван Альхеев, Түнхэн аймагай захиргаанай засаг даргын уялгые даагша Вячеслав Цыбикжапов хабаадалсаа.
17-дохи уласай зунай Хүдөөгэй Нааданууд июниин 23-да түгэсэхэ. Бүхы командна дүндэ илагшада гол шан – УАЗ автомобиль барюулагдаха.
