931
Буряад Уласай Арадай Хуралай хэблэлэй албанай гэрэл зураг
Буряад Уласай табадахи зарлалай Арадай Хуралай ээлжээтэ 30-дахи сесси мүнөөдэр үглөөгүүр ажалаа эхилээ.
Уласай парламентын энэ зарлалай һүүлшын сесси байһан дээрэһээ онсо ёһололнуудаар эхилһэн байха юм. Буряад Уласай Толгойлогшо Алексей Цыденов һунгамалнуудта баяр хүргэжэ, Арадай Хуралай болон Засагай газарай уласаа хүгжөөхэ талаар суг хамтын ажалдаа эдэбхитэйгээр хүдэлжэ байһыень тэмдэглээ. “Хэсүү хүндэ хаһа байгаа. Гэбэшье, орёо асуудалнууд хамтын хүсөөр амжалтатайгаар шиидхэгдээ”, - гээд Алексей Цыденов мэдүүлбэ.
Хуули зохёон гаргажа, уласай хүгжэлтэдэ горитой нүлөө үзүүлһэнэйнгээ, олон удаан жэлнүүдтэ ашаг үрэтэйгөөр ажаллаһанайнгаа түлөө Арадай Хуралай энэ зарлалай олон һунгамалнууд гүрэнэй болон Засагай газарай шагналнуудта хүртэжэ, уласай толгойлогшо тэдэниие һунгамалнуудта барюулба.
Мүнөөдэр һунгамалнууд Буряад Уласай Засагай газарай 2017 ондо яажа ажаллаһан тухай уласай Толгойлогшо Алексей Цыденовэй тоосоото элидхэл шагнахынгаа хажуугаар дүн хамта 31 асуудалаар зүбшэн хэлсэхэ. Тодорхойлбол, хуулиин 26 түсэл болон Арадай Хуралай 5 тогтоол. “Засагай газарай сагта” “Ниитэ нэгэн Росси” намай фракциин һунгамалнуудай дурадхалаар Эсэгэ ороноо хамгаалгын Илалтын 75 жэлэй ойн баяр тэмдэглэхэ хэрэгтэ бэлдэлгэ тухай мэдээсэл шагнагдаха.
Сессиин үедэ һунгамалнууд уласай “Газар тухай”, “Бэеын тамирай соёл болон спорт тухай”, “Нютагай өөһэдын хүтэлбэриин байгуулга тухай” болон бусад хуулинуудта нэмэлтэнүүд оруулагдахаар хараалагдана. Уласай хүн зоной ажабайдалай шанар шэнжэ һайжаруулха талаар хэдэн хуулита дансануудые мүн лэ хараалха түсэбтэй.
“Буряад үнэн” мэдээсэлэй албан
