930
Буряад Уласай Толгойлогшо Алексей Цыденов «Улан-Удэстальмост» заводто тогтоһон байдалаар гараха долоон хоногто суглаа үнгэргэхэ. Энэ суглаанда үйлэдбэриин хүтэлбэрилэгшэ Туфан Садыгов болон энергокомапанинуудай хүтэлбэрилэгшэд хабаадаха. «Улан-Удэстальмост» заводой үйлэдбэриин ажал тогтууритай болгохо түсэб байгуулха зорилготой суглаан эмхидхэгдэнэ.
- «Читаэнергосбыт» эмхиин юрэнхы захирал Алексей Гончаров болон «МРСК Сибири» эмхиин юрэнхы захирал Виталий Иванов хоёртой уулзажа, заводто зайн гал унтараахагүй гэжэ хэлсээб. Гараха долоон хоногто заводто акционернүүд болон элшэ хүсэнэй һалбариин түлөөлэгшэдэй хабаадалгатай зводой ажал гуримшуулха талаар суглаа үнгэргэхэбди. Энэ үйлэдбэриин хүтэлбэрилэгшэ Туфан Садыгов ерэхэ, - гэжэ уласай хүтэлбэрилэгшэ хэлэбэ.
Энэ долоон хоногой эхиндэ зайн галай түлбэриин үриһөө боложо, «Улан-Удэстальмост» заводой ажал тогтоо. Энээнһээ боложо, завод шадар ажаһуугшад зайн гал болон уһаар хангагдахаяа болиһон байна. Буряад Уласай үйлэдбэриин болон худалдаа-наймаанай сайд Алексей Мишенинэй хэлэһээр, заводто үриеэ түлэжэ, ажалаа ябуулжа эхилхэ талаар байдал Буряад Уласай Засагай газарай хиналта доро.
Июлиин 24-дэ Буряад Уласай Засагай газарай Түрүүлэгшын хангалгын байгууламжын талаар орлогшо Евгений Луковниковой хүтэлбэри доро зүблөөн үнгэргэгдэһэн байна. Зүблөөндэ завод зайн галаар хангаха тухай хэлсээ баталха гэжэ «МРСК-Сибири» болон «Улан-Удэстальмост» эмхинүүд хэлсэбэ.
Анна Огороднигой гэрэл зураг
