​Буддын шажанай, соёлой, тамирай ехэ һайндэр

Августын 26–28-ай үдэрнүүдтэ Захааминай Санагын Даша- Пүнсэглинг дасанай шэнэ Согшон дуганай рамнай үнгэргэгдэхэнь. Энэ ехэ буянта хэрэгые Бандида хамба лама Дамба Аюшеев түрүүтэй бүхы дасангуудай шэрээтэнэр бүтээхэ, энэ хэмжээ ябу­улгануудай үедэ Захааминай уран бэлигтэйшүүл дуу хатараараа арад зоноо баясуулха, холо ойрын нютаг нугануудһаа ерэһэн тамиршад Эрын гурбан наадаар мүрысэхэ.

Санагын дасанай шэрээтэ Дагба ламын хэлэһээр, августын 25-най үдэшэ XXIV Бандида-Хамба лама Дамба Аюшеев, дасангуудай шэ­рээтэнэр Санагада бууха. Тэдэнэр хойто үглөөнэй 5 сагһаа Согшон дуганай рамнайн уншалга эхилжэ, үдэшын 9 саг болотор үргэлжэлхэ. Энэ ехэ мүргэлдэ дасанай бүхы жин­дагууд, аймагай эмхи зургаануудай хүтэлбэрилэгшэд уригдана.

Августын 27-ной үглөөгүүр Буряад Уласай Засагай газарай, Арадай Хуралай хүндэтэ түлөөлэгшэдые угтаһанай удаа, Санагын дасанай ламанар Дагба шэрээ­тэ түрүүтэйгээр XXIV Бандида хамба лама Дамба Аюшеевтэ Мандала залаха гэжэ Бато-Жаргал Логинов сэтгүүлшэн мэдээсэнэ.

Заншалта Сангхын эбигээл доро үдэһөө хойшо Эрын гурбан наадан эхилхэ. Эгээл олоной ха­баадалгатайгаар буряад барил­даан үнгэргэгдэхөөр хүлеэгдэнэ. Эдир барилдаашад 30, 35, 40, 45, 50, 55, 60, 65 килограмм хүрэтэр шэгнүүрнүүдтэ болон 2001 онһоо доошо жэлнүүдтэ түрэһэн залуушуул барилдаха. Эрэшүүл 63, 75 кг болон дээшэ шэгнүүртэ хүсэ шадалаа үзэлсэхэ. Абаргын түлөө илаг­шад тэмсэхэ. Түрүүлһэн зондо ехэ бэлэгүүд, тэрэ тоодо хун сагаан хо­нин, хашараг үгтэхэ юм. Абарга бүхэ азаргада хүртэхэ.

Һур харбаашад буряад дүримөөр 60 метрэй зайда мэргэнээ турша­ха. 15 модо зайда буряад үүлтэрэй морид урилдаанда табигдаха. Бүхы тамиршадта нэгэл эрилтэ – зан­шалта хубсаһаараа хабаадаха, гурим дүримүүдые һайнаар сахиха.

Үдэрэй 13 сагта Согшон дуга­най нээлгын баяр ёһолол эхил­хэ. Хүндэтэ айлшадай баярай үгэнүүдээр амаршалһанай удаа, Даша-Пүнсэглинг хиидэй Согшон дуганай барилгада арга шадала­араа туһалһан эбээн тэдхэгшэ­дые хүндэлхэ. Найр наадые уран бэлигтэйшүүл хатар наадаараа, ира­гуу дуунуудаараа шэмэглэхэ.