715
Буряад Уласай Толгойлогшо Алексей Цыденов үсэгэлдэр албанай хэрэгээр Кабанск аймаг гаража, Каменск һууринай Тимлюйн цементын болон шифер үйлэдбэрилдэг Тимлюйн заводуудта хүрэбэ.
- Заводууд ажалаа һайн ябуулна. Мүнөө барилгын һалбари һайн дүнгүүдые харуулна. Үнгэрһэн жэлдэ хэгдэһэн ажалай хэмжээнһээ үлэнгүй, Тимлюйн цементын болон шифер үйлэдбэрилдэг Тимлюйн заводуудта ажал ябуулагдана. Шифер үйлэдбэрилдэг заводой гэрнүүдэй ехэ заһабарида хабаадаха арга боломжонууд хараалагдана. Шиферэй шанар һайн, үнгэ бүриин хушалта хэгдэнэ. Ехэ заһабариин жасатай хамта Тимлюйн завод энэ программада яажа хабадуулха тухай хэлсэхэбди, - гэжэ уласай хүтэлбэрилэгшэ хэлэбэ.
Тимлюйн цементын заводто Алексей Цыденов мүнөө үеын хэрэгсэлнүүдээр хангагдаһан багсалгын (упаковочный) цехтэ хүрэбэ. Эндэ үйлэдбэрилһэн эд бараа «Буряадта хэгдээ» гэһэн тэмдэгтэйгээр багсалагдана. Удаань Буряад Уласай Толгойлогшо заводой хүдэлмэрилэгшэдтэй уулзажа, үйлэдбэриин болон Каменск һууринда шиидхэхэ асуудалнуудаар хэлсэбэ.
Монохотонуудые хүгжөөхэ программаар Каменск һууринда түбэй гудамжануудай һэльбэн шэнэдхэлгэ хэгдэнэ. Алексей Цыденов хэгдэһэн ажал сэгнэжэ, дутуу дундануудаа заһахыень тэмдэглэбэ.
- Харгы хэгдэбэшье, ябаган харгы, светофор эндэ үгы. Автобусай буудал болбосон түхэлтэй болгогдоогүй. Энэ талаар ажал дүүргэхэ хэрэгтэй, - гэжэ Алексей Цыденов хэлэбэ.
Буряад Уласай Толгойлогшо Алексей Цыденовэй хэлэһээр, монохотонуудые хүгжөөхэ программаар гансашье харгынууд заһабарилагдана бэшэ, тиихэдэ олониитэдэ удха шанартай газарнууд болбосон түхэлтэй болгогдоно.
Буряад Уласай Засагай газарай хэблэлэй албанай гэрэл зураг
