Буряадай ирагуу найрагша Намжил Нимбуевай түрэл нютагтань хүшөө табигдаба

Буряадай элитэ хүбүүдэй нэгэн Намжил Нимбуевай түрэл нютагтань, Ярууна аймагай Эгэтын-Адагта хүшөө табигдаба. Намжил Нимбуев мүнөө амиды мэндэ ябаа һаа, 80 жэлэйнгээ ойн баяр угтаха байгаа. Энэ хүшөө скульптор Баир Сундупов урлан бүтээгээ. Хүшөө нээлгын баяр ёһололдо Намжил Нимбуевай дүү басаган Любовь Базарова болон дүү хүбүүн Баир Нимбуев гэгшэд хабаадаа.

- Түрэл нютагтамнай Намжил Нимбуевай хүшөө табигдаһанда бидэ ехэ баяртайбди. Хэдэн жэлэй туршада һанаһан һанал бүтээгдэбэ. Хүшөө бүтээлгэдэ хабаадаһан хүнүүдтэ баяр хүргэнэбди. Һургуулиин дэргэдэ хүшөө табигдаһаниинь һайшаалтай. Ургажа ябаа улаан бургааһад ирагуу найрагшадые мэдэжэ ябаха ха юм, - гэжэ Любовь Базарова хэлэбэ.

Буряад Уласай театрай ажал ябуулагшадай эблэл Намжил Нимбуевай түрэһөөр 80 жэлэй ойн баярта зорюулан, Улаан-Үдын уран һайханай залуушуулай театрай табиһан «Намжил Нимбуев. Шүлэгүүд» гэһэн зүжэг Хэжэнгэ болон Ярууна аймагуудта табиба. Энэ хэмжээ ябуулга Буряад Уласай Засагай газарай болон соёлой яаманай дэмжэлгээр эмхидхэгдэбэ.

Байгша оной сентябриин 18-да «Намжил Нимбуев. Шүлэгүүд» гэһэн зүжэг - Хэжэнгын, сентябриин 19-дэ – Нарһатын, сентябриин 20-до Эгэтын Адагай ажаһуугшадта харуулаа. Зүжэг дотор Буряадай ирагуу найрагшын уран шүлэгүүд оруулагдаһан байха юм.

Зүжэгшэд Намжил Нимбуевай шүлэгүүдые хүгжэм доро ирагуу гоёор уншана. Энээниие 2016 оной июнь һарада найруулагша Артём Баскаков табиһан байна. Харагшад «Намжил Нимбуев. Шүлэгүүд» гэһэн зүжэг үндэрөөр сэгнэбэ.

Һонирхолтойнь гэхэдэ, тон иимэ хүшөө Болгари гүрэнэй Плиска хотодо октябрь һарын һүүл багта табигдаха юм. Энэ түсэлэй автор Карен Алексанянай һаналаар, Плиска хотын аллейдэ элдэб яһата арадуудай уран зохёолшодой 80 хүшөө табигдаха. Тиихэдэ хүшөө доро элитэ уран зохёолшодой нютагһаа асарагдаһан шорой хэгдэхэ юм.