​​Сэтгүүлшэдэй холбооной зуун жэлэй ойн баяр

Үглөөдэр, октябриин 14-дэ Ородой Холбоото Уласай Сэтгүүлшэдэй холбоон байгуулагдаһаар 100 жэлэйнгээ ойн баяр тэмдэглэнэ. Ушар тиимэһээ Россиин бүхы можо нютагуудһаа 1000-аад сэтгүүлшэд Москва хотодо сугларанхай, тэрэ тоодо Буряад Уласай Сэтгүүлшэдэй холбооной түрүүлэгшэ, Буряадай гүрэнэй телерадиокомпаниин юрэнхы захирал Марина Урбаева түрүүтэй 6 сэтгүүлшэн ойн баярай хэмжээнүүдтэ оролсожо байна.

Гүрэн түрын бүхы сурбалжалагшадые нэгэдүүлхэ, эрхэнүүдыень аршалан хамгаалха гэһэн үүргэтэйгээр аяар 100 жэлэй саана байгуулагдаһан Россиин Сэтгүүлшэдэй холбоон һүүлэй жэлнүүдтэ эдэбхижээ, жэл бүри хуралдаануудые эмхидхэнэ гээд, ойн баярта оролсожо байгшад гансата тэмдэглэнэ. Илангаяа һаяхана «Ородой Холбоото Уласай габьяата сэтгүүлшэн», «Ородой Холбоото Уласай хэлхеэ холбооной болон мэдээсэлгын габьяата хүдэлмэрилэгшэ» гэһэн шэнэ шагнал хайра байгуулагдаа. Тиигэжэ гүрэнэй талаһаа сэтгүүлшэнэй ажал бүри үндэрөөр сэгнэгдэдэг болоо. Энээн тухай Россиин Сэтгүүлшэдэй холбоониие мүнөө ударидажа ябаһан Владимир Соловьёв ойн баярай хэмжээнүүд тухай ТАСС-та сурбалжалагшадтай уулзахадаа, онсолон тэмдэглэһэн байна. Тиихэдээ үшөө иигэжэ нэмээ: «Байгша ондо регионуудай олондо мэдээсэлгын албанууд руу хахад миллиард түхэриг һомологдонхой. Гэбэшье можо нютагуудта хүдэлжэ байһан сэтгүүлшэдэй салин тон бага зандаа. Нютагай сониной залуу мэргэжэлтэн 6-7 мянган түхэриг салинтай байна. Владимир Путинда энэ бэрхэшээл заатагүй дуулгахаб, шиидхэбэри бэдэрхэб».

Энэ жэлэй эхинһээ Россиин бүхы можо нютагуудта «Инфорум» гэжэ һуралсалай талмайнууд эмхидхэгдэнэ. Тиигэжэ сэтгүүлшэд мэргэжэлээ дээшэлүүлнэ. Жэшээнь, һаяхана Сочи хотодо 5 үдэрэй туршада сэтгүүлшэдэй форум үнгэржэ, 100 гаран хэмжээ ябуулганууд эрхилэгдээ.

Гэбэшье Россиин Сэтгүүлшэдэй холбооной ойн баярай хэмжээн соо сурбалжалагшад Москваһаа олондо мэдээсэдэг албануудай ажал хүдэлмэритэй танилсаа. «1 канал», «Россия1», «Московский комсомолец» болон бусад руу хүрэһэн байна. Удаань Ородой Холбоото Уласай гүрэнэй яамануудаар тараа. Илангаяа Буряадай түлөөлэгшэд Россиин Ажалай болон социальна хамгаалгын яаман руу ошоһон байна.

Гэбэшье Москвада буухатаяа сасуу Буряадай сэтгүүлшэд Улаан талмай хараа. Хяагтада хилын харуулай «Гвардеец» сониной харюусалгата секретарь Александр Фарфутдинов анха түрүүшынхиеэ Россиин зүрхэн руу хүрэһэндөө угаа баяртай. Гадна «Буряадта АИФ» сониной ахамад редактор Анатолий Базархандаев, «Байкал Медиа Консалтингай» юрэнхы захирал Сергей Бурдиков, «Байкал-Daily» агентствын ахамад редактор Светлана Инкеева, Буряадай гүрэнэй телевидениин Сергей Исаков гэгшэд ойн баярай хэмжээ ябуулгануудта оролсожо байна. Бүри дэлгэнгыгээр удаадахи дугаартаа энэ хэмжээн тухай дуулгахабди.

Авторай гэрэл зураг дээрэ

Буряадай түлөөлэгшэд ойн баярай хэмжээнүүдтэ оролсожо байна