1853
Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутнев февралиин 1-дэ албанай хэрэгээр Буряад Улас ерэхэ. Энэнэн тухай Буряад Уласай Толгойлогшо Түнхэн аймагаар ябахадаа хэлэһэн байна.
«Алас Дурнын тойрогой тэдхэмжэ хубаарилагдаха. Тэрэ тоодо, Түнхэн аймагта мүнгэн һомологдохо. Ниигэмэй һалбариин эмхинүүдэй барилга, заһабарилга хэгдэхэ юм. Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутнев албанай хэрэгээр ерэхэ. Алас Дурнын тойрогой үзүүлхэ тэдхэмжээр ямар хэмжээ ябуулганууд үнгэргэгдэхэб гэжэ харуулха, хөөрэхэ, хамгаалхабди. Тиихэдэ Түнхэн аймагай ниигэмэй һалбариин олон эмхинүүд энэ бүридэлдэ орохо гэжэ найданабди», - гэжэ Алексей Цыденов тэмдэглэбэ.
Январиин 21-дэ Ородой Холбоото Уласай Засагай газарай Түрүүлэгшэ болон вице-премьернүүдэй зүблөөндэ Алас Дурнын федеральна тойрогой тэдхэмжэнүүдтэ Буряад Улас болон Үбэр Байгалай хизаарай хүртэхэ талаар ажал ябуулагдана гэжэ Юрий Трутнев хэлэһэн байна.
«Эдэ хоёр можо нютагуудта ошожо, байдалтайнь танилсаха түсэбтэйб», - гэжэ Юрий Трутнев гэжэ тэмдэглээ.
2019 онһоо хойшо, гурбан жэлэй туршада, Буряад Улас болон Үбэр Байгалай хизаарта 19,8 миллиард түхэриг дамжуулагдаха. Тиихэдэ можо нютаг бүхэндэ адляар мүнгэн хубаарилагдаха.
