​​Кино бүтээгшэ «Уладай Баяр»

Баир Уладаев

Кино найруулагша, олониитын ажал ябуулагша Баир Уладаевай нэрэ арад зондо мэдээжэ болонхой. Һаяхана “На берегу мечты” гэһэн кинониинь үргэн экранда гаража, харагшадай үндэр сэгнэлтэдэ хүрэбэ.

Валентина Цыренжаповна, Най­дан Намсараевич Уладаевтанай гэр бүлэдэ ехэ шоно уг үргэлжэлүүлжэ, 1 хүбүүн, 4 басагадай удаа айлай одхон боложо, Хэжэнгэ аймагай Загаһата нютагта Баир түрэһэн юм. Эжынь гүүртэ дээрэ хонишоноор, абань боксын һоригшоор, сэрэгэй хэшээ­лэй, түүхын багшааршье һургуулида хүдэлөө. Баирай бага балшар наһан Хэжэнгэ аймагай Загаһата нютаг­та үнгэрөө юм. Һургуулиин һүүлээр Баир БГУ-гай зүүн зүгэй факуль­тедтэ орожо һураа. Япон, англи, хи­тад хари хэлэнүүдэй оршуулагшын мэргэжэлдэ һуража байтараа, сэрэгэй албанда татагдаа. Албаяа дүүргэһэнэй тэндэһээ бусахадаа, Улаан-Үдэ хотын 16-дахи лицейдэ һуража, тогоошоной мэргэжэл шудалжа га­раа. Гэбэшье өөһэдын эдеэ хоолой кафе нээгээд хүдэлөө. Баир гэртэ­хиндээ амтатай эдеэ хоол шанажа, баян шэрээ бэлдэжэ баярлуулдаг.

Һонирхолтой түсэл бэелүүлээ

2013 ондо аймаг бүхэнһөө эдэбхи үүсхэл ехэтэй, за­луу 13хүбүүд, баагадые суглуулжа, Росси гүрэнөөр автопробег эмхидхэжэ гараһан бай­на. Тиигэжэ Эрхүү хотоһоо эхилээд, Самара, Сочи, Дагестан гэхэ мэтэ 27 можо нютагаар ябажа, 20000 км зай гаталжа ерэһэн байна. Бу­ряад Уласһаа гадуур ондоо можо нютагуудта аяншалга яажа хүгжэнэб, энэ һалбарида ямар ажал ябуулхаар бэ гэжэ тэдэнэр хараа. Буряад Уласнай хүгжэжэ, ондоо хари гүрэнүүдһээ аяншалагшад олоор ерэжэ, манай арадтай, ёһо заншалтай дүтөөр та­нилсуулха хүсэлтэй бай­гаа.

Сүлөө сагаа үнгэргэлгэ

Баир Найданович ород хэ­лэн дээрэ шүлэгүүдые бэшэдэг. Сүлөө сагтаа гуурһаяа туршадаг тухайнь хэншье мэдэнэгүй. Ябан ошон туршалгануудаа ном болгожо хэблүүлхэ хүсэлтэй. Уладай Баир Ойхон, Аха, Алхана ба бусад гоё һайхан шүтөөнэй газарнуудаар ябаха, мүн тиихэдэ загаһа бариха дуратай бшуу. Мүнөө бэлигтэй найруулагша гэр бүлөөрөө Улаан-Үдэдэ ажаһуудаг. Тэрэнэй хани нүхэр Ирина Урбаева кинофильмнүүдтэнь удха най­руулан зохёолсодог.

Кино буулгаха агшан зуура. Баир Уладаев - гол рольдо

Ажабайдалайнь нангин хэрэг

Баир Уладаев хадаа эрид эгсээр хуби заяагаа ху­билгажа, кино буулгаха харгыда гараһан байна. Уша­рынь юуб гэхэдэ, ном бэшэхэ гэжэ байһанаа, тэрэ кино буулгаха гэжэ шии­дээ. Тиихэдээ өөрынгөөшье ба арад зонойнгоошье ажамидарал, сэдьхэлэй байдал харуулха гэжэ оролдоһон юм. Тон түрүүн Баир Найданович “Живи”, “Сэржэм” кинофильмнүүдые буулгаһан гэжэ уншагшадтаа һануулнабди.

Баир Найданович “Уладай Баяр” гэһэн киносту­ди байгуулжа хүтэлбэрилдэг. Түрүүшын “Живи” гэһэн фильмэеэ өөрын мүнгөөр буулгаһан байна. Хоёр­дохи “Сэржэм” гэһэн фильм буулгахадань, Арадай Хуралай һунгамал Аркадий Цыбиков, Хэжэнгэ аймагай Ушхайта нютагай эбээн тэдхэгшэ-олзын хэ­рэг эрхилэгшэ Радна Рампилов, Фе­дерациин Соведэй гэшүүн Вячеслав Мархаев гэгшэд туһалаа юм. Тиихэдэ “Сэр­жэм” фильм “REC на Байкале” гэһэн уласхоорондын кинофестивальда илажа гараа.

Февралиин һүүл багта “На берегу мечты” гэһэн шэнэ фильмтэйнь кинодо дуратайшуул танилсабад. Энэнь бүхы Росси гүрэнэй үргэн дэлгэ­сэдэ харуулагдаха юм..

Баир Найданович ганса фильмнүүдые найруулан буулгадаг бэшэ, мүн Буряад соёлоо аршалан хамгаалха гэжэ оролдожо, ниигэмэй элдэб түсэлнүүдые эрхил­дэг. Һаяхана “На берегу мечты”, “Два капитана” гэһэн фильмнүүдээр “Уладай Баяр” “Русская Фильм Груп­па” кинокомпанинууд хоёрой хоо­рондо эмхидхэгдэһэн түсэлнүүдэй презентаци үнгэрөө. Дээрэ нэрлэгдэһэн фильмнүүдэй найруулагшань - Баир Уладаев, харин продюсерынь Алек­сей Петрухин гэгшэд болоно. Тиихэдэ кино буулгаха тухай эдэ хоёр киноком­пани хэлсээ баталаа.

“На берегу мечты” кино найруулагшын ба актёрнуудай эрхим ажалай түлөө “Восток-Запад” гэһэн муласхоорон­дын 11-дэхи кинофестивалиин шанда, мүн үндэһэтэнэй кинофильмнүүдые хүгжөөһэнэй тусхай шанда хүртэһэн байна.

Ерэхэ зун “Два капитана”, мүн бу­ряад хэлэн дээрэ “Зуһалан” гэһэн фильм Баир Уладаев буулгаха түсэбтэй.

Мүнөө сагта буряад хэлэнэй байдал хүндүүлхэй асуудалнуудай нэгэн гэжэ булта мэдэнэ. Тиимэһээ саашадаа Баир Найда­нович буулгаһан кинофильмнүүдтээ бага багааршье хадаа буряад үгэнүүдээ оруулха хүсэлтэй. Тэрэшэлэн кинофильмнүүд со­огоо буряад арадайнгаа түүхэ, соёл, ёһо заншал, мүн буряад яһатан хэд гээшэб гэжэ харуулхаяа оролдодог байна. Тиигэжэшье һаа, залуушуулнай бу­ряад хэлэеэ хүгжөөхэ, арадайнгаа ёһо заншал мартангүй, саашань үри хүүгэдтээ дамжуулжа байха бэзэ гэжэ найдана.

Энэ һонирхолтойшье һаа, хүшэрхэн ажалдань олон нүхэдынь, гэртэхиниинь хамһалсадаг, мүн Бу­ряад Уласай Толгойлогшо Алексей Цыденов болон Буряадай Соёлой яа­ман мүнгэн тэдхэмжэ үзүүлнэ, дэмжэнэ.

Иимэл даа, буряад хүбүүдэймнай нэгэнэй хуби заяан. Саашанхи кино буулгаха харгынь арюун байхын тула амжалта хүсэе.

ВКонтакте сүлжээнһээ гэрэл зурагууд абтаба