661
Түймэрэй аюултай хаһын эхилһэнһээ хойшо Буряад уласта хагда галдаһан 113 ушар болоһон байна. Үнгэрһэн амаралтын үдэрнүүдтэ улас дотор бог шорой галдаһан 24 ушар, хагда галдаһан тухай 15 мэдээсэл бүридхэлдэ абтаа. Энээн тухай уласай оперативна штабай суглаанда мүнөөдэр, апрелиин 8-да, Буряад Уласай Засагай газарай Түрүүлэгшын аюулгүй байдалай талаар орлогшо Петр Мордовской хэлэһэн байна.
- Эдэ ушарнуудһаа гал һууринуудта гү, али ойдо һүжэрөө һаань яахаб? Хагда галдаһан хүнүүдые элирүүлжэ, захиргаанай харюусалга даалгаха хэрэгтэй, - гэжэ Петр Мордовской тэмдэглэбэ.
Ойн жасада дүтэ байһан газартай хүнүүд, тэрэ газараа хуурай ногоонһоо, хатанхай модо, гэшүүһэнһээ арилгаха, ойһоо халхалһан зурууд татаха ёһотой гэжэ ойн харуулшад дахин һануулна. Эдэ газарта модо, бургааһан, үрмэдэһэнэй ургабал, эзэдтэнь захиргаанай харюусалга тохогдохо.
Тиихэдэ үнгэрһэн амаралтын үдэрнүүдтэ Буряад уласай Бэшүүр, Зэдэ, Загарай, Тарбагатай аймагуудта ойн түймэрэй гараһан тухай 9 мэдээсэл бүридхэлдэ абтаа. Тэдэнэй унтараалгада 142 ойн харуулшад, « Үбэр Байгалай баазын авиационно ойн харуулай» түймэр сарагшад-парашютистнар, ой ашаглагшад хабаадалсаа.
Буряад уласта түймэрэй аюултай хаһын эхилһэнһээ хойшо 230 гектар талмайда 29 түймэр гараһан байна.
Түймэрэй гараһан тухай 20-44-44 гэһэн утаһаар дуулгыт гэжэ ойн харуулшад ажаһуугшадта хандана.
