​Буряад Уласай Зэдэ аймагай больницада Алас Дурна зүгэй тэдхэмжын мүнгөөр шэнэ рентген аппарат абтаха

Авторай гэрэл зураг дээрэ Баярма Бубеева (баруун гарһаа)

Зэдэ аймагай больница 22 мянга гаран хүн зониие хангана. Ахамад врач Баярма Бубеевагай хэлэһээр, больницада 106 хүн нэгэ доро хэбтээд аргалуулха аргатай. Тиихэдэ үдэртөө эмшэлүүлжэ байхын тула 65 һуури түхеэрэгдэнхэй. Поликлиникэдэ нэгэ үдэр соо дунда зэргээр 240 хүн хандана.

- Поликлиникынгээ байшаниие заһабарилха түсэбтэйбди. Юуб гэхэдэ, “Гамтай поликлиникэ” гэһэн бүхэроссиин түсэл маанадта бэелүүлэгдэжэ эхилхэнь. Тиигэжэ гурбадахи дабхараа заһабарилаа һаамнай, ехэ һайн байгаа, - гэжэ Баярма Бубеева найдалаа мэдүүлнэ.

Зэдэ аймаг уушханай ханяаданай үбшэндэ нэрбэгдэһэн хүн зоной тоогоорБуряад Уласта түрүүлнэ. Энэ хүндэ үбшэ элирүүлхын тула һайн аппарат хэрэгтэй. Харин эндэ хэрэглэгдэжэ байһан рентген-түхеэрэлгэ аяар 1997 ондо абтаһан юм.

- Манай аймагта уушханай ханяаданда нэрбэгдэһэн зоной тоо арбаад жэлэй туршада бага болоногүй. Хуушарһан рентген дээрэ үбшэнэй түрүүшын шата һайнаар элирүүлжэ шаданагүйбди. Мүн тиихэдэ нарин үбшэнтэнэй тоо дээшэлнэ. Эндэ баһа заал һаа һайн рентген хэрэгтэй болоно бшуу, - гэжэ Баярма Бубеева мэдүүлнэ.

Буряад Уласай Толгойлогшо Алексей Цыденов Алас Дурна зүгэй тэдхэмжын мүнгөөр шэнэ рентген аппарат мүнөө жэл абажа үгэхэ тухайгаа Зэдын ажаһуугшадые найдуулаа.