1074
Н.Б. Дамирановай нэрэмжэтэ Сэлэнгэ аймагай Гусиноозёрскын соёл уралигай һургуулида түрүүшынхиеэ ехэ заһабарилга хэгдэхэ. Алас Дурнын тойрогой тэдхэмжын хэмжээндэ заһабарилгада 4,1 сая түхэриг һомологдохо.
Сэлэнгэ аймагта 42 мянган хүн ажаһуудаг юм. Буряад уласай үйлэдбэриин түб болохо Гусинооозёрск хотодо 24 мянган хүн түбхинэнхэй.
Н.Б. Дамирановай нэрэмжэтэ Сэлэнгэ аймагай Гусиноозёрскын соёл уралигай һургуулида 329 үхибүүд һурадаг. Бэлигтэй үхибүүд уласхоорондын, можо хоорондын, уласай конкурснуудта нэгэнтэ бэшэ лауредуудай нэрэ зэргэдэ хүртэһэн байха юм. Гусиноозёрскын соёл уралигай һургуулида үхибүүд долоон хоногой зургаан дахи хоёр ээлжээндэ хэшээлнүүдтэ ябадаг. Тиихэдэ тус һургуули 1975 ондо баригдаһан барилгын эмхиин байшанда ажалаа ябуулдаг. Хэшээлнүүдые үнгэргэхэ 20 танхимуудһаа зариманиинь СанПинай эрилтэнүүдтэ таарадаггүй. Энэ байшанай баригдаһан сагһаа хойшо ехэ заһабари хэгдээгүй, гансал һуралсалай жэлэй эхиндэ өөрын хүсөөр шэрдэдэг, будадаг байна.
Алас Дурнын тойрогой тэдхэмжын хэмжээндэ һомологдохо мүнгөөр һургуулиин хушалта шэнэлэгдэжэ, һургуули шадарха газар болбосон түхэлтэй болгогдожо, заһабарилгын ехэ ажал хэгдэхэ. Заһабарилгын хэгдэһэнэй удаа шэнэ таһагууд нээгдэжэ, һурагшадай тоо дээшэлхэ юм.
Ородой Холбоото Уласай Юрэнхылэгшэ Владимир Путинай ноябриин 3-да абтаһан Тогтоолой ёһоор Буряад Улас Алас Дурнын федеральна тойрогто оруулагдаа гэжэ һануулнабди. Тиимэһээ Буряад Уласай хүгжэлтэдэ Алас Дурнын тэдхэмжэ үзүүлэгдэнэ. Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро ажаллаһан комисси мартын 14-дэ Буряад уласай эдэй засагай хүгжэлтын түбүүдэй ниигэмэй түсэб дэмжэһэн байна. Энэ түсэбтэ 6 миллиард түхэригэй 73 хэмжээ ябуулга оруулагдаа гэжэ һануулнабди. Алас Дурнын тойрогой тэдхэмжээр 2019 - 2021 онуудта соёлой һалбариин 11 эмхи заһабарилагдаха, баригдаха юм.
Буряад Уласай Засагай газарай мэдээсэлэй албанай гэрэл зураг
