​​ДЭЛХЭЙН ДОРЬБОТОР, ДЭБХЭРЭЛДЭН НААДАЯ!

Арабай Нэгэдэһэн Эмирадууд, Финлянди, Австрали, Канада, Тайланд, Испани, Германи гээд лэ, «Буряад үнэн» Хэблэлэй байшанай 2011 онһоо хойшо эмхидхэжэ байһан «Бүхэдэлхэйн ёохорто» хабаадаһан гүрэнүүдые нэрлэхэдээ, буряад хүнэй хүрөөгүй газар дэлхэйн бүмбэрсэг дээрэ үгы юм хаш даа гэжэ ойлгохоор болоно. Теэд хаанашье ажаллажа, амидаржа байһан аха дүүнэрнай Буряад орон руугаа, Улаан-Үдэ хото тээшээ харасаяа шэглүүлэн, бүхыл буряадуудаймнай түб гэжэ мэдэрдэг байһаниинь арсашагүй.

Хилын саагуур, наагуур тараһан буряадуудаа сэдьхэлээрынь нэгэдүүлхэ зорилго табихадаа, ямархан хэмжээ ябуулга үнгэргэхэ гээшэб гэжэ бодолгото болоһоной удаа ёохороо шэлэһэмнай ушартай юм аабза. Гар гараа барилсаад, мүр мүрөө түшэлсөөд хатархадаа, хоолойнгоо шадал шалган дуулалдахадаа, сэдьхэлээ һэргээжэ, эршэ хүсэ орохоһоо гадна, хэрэгтэй сагта хэн хэнээ дэмжэхэ дүнгэхөөр бэлэн агуу түүхэтэй арадай түлөөлэгшэд гээшэбди гэжэ дахин-дахин мэдэрнэ ха юмбибди даа.

Сагаалганай үеэр үнгэргэгдэжэ байһанаа мүнөө жэлһээ «Байгал» театрай эмхидхэдэг «Ёохорой һүнитэй» нэгэдүүлэгдэһэн тус хэмжээ ябуулгадамнай энэшье удаа дэлхэйн олон-олон гүрэнүүдтэ, мүн Ородой Холбоото Уласай можо нютагуудта түбхинэһэн буряадууд хабаадахань. Мүнөө дээрээ хэдэн мэдүүлгэнүүд, видео-бэшэлгэнүүд [email protected] гэһэн сахим хаягаарнай ороод байна. Буряад Уласаймнай аймагууд яһала эдэбхитэйгээр оролсоно гэжэ тэмдэглэхэ хэрэгтэй.

Июниин 28 болотор мэдүүлгэнүүдые хүлеэн абажа бүридхөөд, эблүүлээд, Этнографическа музейдэ июниин 29-дэ болохоёо байһан «Ёохорой һүниин» үедэ дэлгэсээр дамжуулхын хажуугаар, эгээл эрхим ёохоршодые элирүүлжэ гаргахабди гэжэ дуулгая. Ямар шан барюулха гээшэбибди гэжэ хэлсэһэнэй һүүлээр, урданайнгаа уламжалалай ёһоор, хони зааха гэжэ шиидэбэбди!

«Бүхэдэлхэйн ёохорто» США-гай Нью-Йорк, Лос-Анджелес, Атланта, Испаниин Мадрид, Барселона, Франциин Париж, Фонтенбло, Хитадай Шанхай, Япониин Токио, Солонгосой Сеул, Монголой Улаан-Баатар болон аймаг, сомонууд, мүн Ородой Холбооной Саха-Яхад, Татар Уласууд, Москва, Санкт-Петербург, Хабаровск, Томск ба бусад можо нютагууд, хото тосхонууд жэлһээ жэлдэ эдэбхитэйгээр хабаададаг, энэшье удаа оролсохо байха гэжэ хүлеэнэбди.

«Бүхэдэлхэйн ёохорто» нэгэдэжэ, бүмбэрсэгые бүһэлэн хатарая!

Анна Огороднигой гэрэл зураг