1035
Буряад Уласай Толгойлогшын дэргэдэхи Ахамадуудай зүблэлэй суглаанда улас дотор наһажаал зониие дэмжэхэ, ниигэмэй туһаламжа үзүүлхэ талаар асуудалнуудаар хэлсэбэ.
Ахамадуудай зүблэлэй гэшүүд Загарай, Мухар-Шэбэр, Зэдэ, Тарбагатай аймагуудаар ябажа, ниигэмэй һалбариин байдал тухай уласай хүтэлбэрилэгшэдэ тоособо.
- Бидэнэр ниигэмэй һалбариин байдал шалгаха гэһэн зорилготой бэшэбди, харин нютагуудай ажабайдалтай танилсажа, ямар ажал хэгдэнэб гэжэ харанабди. Ажаһуугшадтайшье уулзаһан байнабди. Ниигэмэй һалбариин эмхинүүдтэ мэргэжэл ехэтэй хүдэлмэрилэгшэдэй ажаллаһаниинь һайшаалтай. Хэбтэри болоһон, эрэмдэгтэй зондо тэдэнэр зөөлэнөөр хандажа, туһа хүргэнэ, - гэжэ Ахамадуудай зүблэлэй гэшүүн Иван Калашников хэлэбэ.
Буряад Уласай Засагай газарай бэелүүлхэ зорилгонуудай нэгэн хадаа ниигэмэй һалбариин эмхинүүдэй зөөриин-оньһон хэрэгсэлнүүдые хүгжөөлгэ болоно гэжэ уулзалгада хабаадагшад тэмдэглэбэ. Буряад Уласай ниигэмэй хүгжөөлгын сайд Татьяна Быковагай хэлэһэнэй ёһоор, тус эмхинүүдтэ хэрэгсэлнүүдээр хангаха талаар ажал эхилэнхэй. Стационарна эмхинүүдтэ 2016 онһоо 2018 он болотор зөөриин-оньһон хэрэгсэлнүүдые һэльбэн шэнэдхэлгэдэ 85 саяһаа дээшэ түхэриг һомологдоо, тэрэнэй 47,6 сая түхэриг 2018 ондо гаргашалагдаа.
- Байгша ондо ветерануудай госпитальда 25 сая түхэригэй рентгенаппарат табигдаха, - гэжэ Буряадай Толгойлогшо хэлэбэ.
Мүнөө Буряад уласта ниигэмэй туһаламжа хүргэлгын 49 эмхи ажалаа ябуулна гээд тэмдэглэлтэй.
«Демография» гэһэн үндэһэтэнэй түсэлэй «Ахамад зон» гэһэн федеральна түсэл бэелүүлгын хэмжээндэ Буряадта нүүдэл бригаданууд байгуулагдана. Тэдэнэр үдэр бүри ябадаг олониитын унаагүй хүдөө нютагуудта ажаһуудаг 65 наһанһаа аха зониие эмнэлгын эмхинүүдтэ хүргэхэ юм. Иимэ унаа Бэшүүр, Зэдэ, Ярууна, Захаамин, Хэжэнгэ, Хяагта, Мухар-Шэбэр, Байгал шадарай, Сэлэнгэ, Тарбагатай, Түнхэн, Хори аймагуудай ажаһуугшадые хамгаалгын ниигэмэй 11 таһагта дамжуулагдаха. Энэ хэрэгтэ федеральна бюджетһээ 22,5 сая тухай түхэриг һомологдохо.
Тиихэдэ улас дотор ахамад зоной «Университет третьего возраста» гэһэн түсэл урагшатай бэелүүлэгдэнэ гэжэ ниигэмэй хүгжөөлгын сайд Татьяна Быковагай хэлэбэ.
Ахамадуудай зүблэлэй гэшүүн Вячеслав Подлеснов “улас дотор һайн хэрэгүүд хэгдээшье һаа, тэрээн тухай олондо мэдээсэл хэрэгсэлнүүдтэ тунхаглагданагүй” гэжэ шамарлана.
“Дайнай үхибүүд” тухай хуули абаһанай түлөө Ахамадуудай зүблэлэй гэшүүд уласай хүтэлбэрилэгшэдэ баяраа мэдүүлбэ. 1928 оной январиин 1-һээ 1945 оной сентябриин 2 болотор түрэһэн эрхэтэд «дайнай үхибүүдэй» зэргэдэ хүртэһэн Ородой Холбоото Уласай 20 можо нютагуудай тоодо Буряад улас оролсоһон байна гээд тэмдэглэлтэй. «Дайнай үхибүүдэй» тоодо Буряадта 32,6 мянган хүн ороно, тэдэнэй 7 мянган тухай хүндэ ниигэмэй тэдхэмжэ түлэгдэнэ.
Уулзалгын дүнгүүдээр, буряад Уласай Толгойлогшо Алексей Цыденов ахамад зондо эдэбхитэй ажалайнь түлөө баяр хүргэжэ, иимэ уулзалгануудые үнгэргэжэ байха тухай дурадхаба.
Буряад Уласай Засагай газарай мэдээсэлэй албанай гэрэл зураг
