1026
“Тугшан” гэһэн зүжэг Саян Жамбалов зохёожо, Москва хотын Виктория Печерникова зүжэг найруулан табяа.
- Мүнөө үе зураглан харуулһан тус зохёол дотор та бидэн тухай хэлэгдэнэ гэхээр. Үйлэ хэрэгүүд Ага тойрогой Тугшан нютагта болоно. Залуу хүбүүн өөрыгөө олохоёо оролдоно. Тиихэдээ элинсэг хулинсагуудайнгаа һүнэһэ харадаг боложо, угаа мүшхэжэ, мүрдэжэ эхилээд, хэн гээшэбиб, ямар үүргэтэй түрэһэн хүмбиб гэжэ мэдэрнэ. Энэ ушар гансашье Буряад орондо хабаатай бэшэ, ямаршье можо нютагта иимэ үзэгдэлнүүд болодог. Хүн өөрынгөө харгы олохо ёһотой бшуу. Энээн тухайл даа, манай зүжэг, - гээд найруулагша Виктория Печерникова тэмдэглэнэ.
Шог ёгто зүжэг драмын ба фантасмагорииншье шэнжэтэй.
- Үндэһэнэй театртай түрүүшынхиеэ хүдэлнэб. Тиигэжэ олон һайхан мэдэрэл сэдьхэлдэмни түрэнэ. Ондоо хэлэтэй, онсо соёлтой арадай ёһо заншалнуудые, түүхэ, һүлдэ тэмдэгүүдые шудалха арга боломжотой байһандаа баяртайб, - гэжэ найруулагша мэдүүлнэ.
