935
6-дахи-11-дэхи ангинуудай һурагшадые ерээдүйнь мэргэжэлдэ шэглүүлхэ зорилготой “Ерээдүй руу билет” гэһэн түсэл 2018 онһоо бэелүүлэгдэнэ. Тэрэ Ородой Холбоото Уласай Юрэнхылэгшын “Һурган хүмүүжүүлэгшэ” гэһэн бүхэроссиин хуралдаанай хабаадагшадтай уулзалгын дүнгүүдээр үгэһэн даалгабаринуудай болон “Үхибүүн бүхэнэй амжалта” гэһэн федеральна түсэлэй үндэһөөр зохёогдонхой.
Түсэл гурбан шатаһаа бүридэнэ. Эхин дээрээ хабаадагшад онлайн-элирүүлэлгэ гарана. Тиигэжэ тэдэ хэр мэргэжэлээ шэлэхээр бэлэн бэ, хэр зэргэ харюусалгатайгаар хандана гээшэб, шухала дадалнуудайнь хэмжээн (хадууса, анхарал, бодохо ухаан, харилсаха шадабари), ямар мэргэжэлнүүдээр һонирходог бэ болон ямар юумэндэ бэрхэб гэжэ элирүүлэгдэнэ.
Хоёрдохи шатада һурагшые шэлэһэн мэргэжэлтэйнь дүтөөр танилсуулна.
Гурбадахи шатада һурагша бүхэн шэлэһэн мэргэжэлтэеэ тааралдуулан, һуралсалай түсэб табиха зууршалга абана. Эндэ һурагшын шэлэһэн мэргэжэлдэ хабаатай хүгжөөлгын хэмжээ ябуулганууд, курсанууд, кружогууд тухай мэдээнүүд, мүн тиихэдэ эрдэм мэдэсынь хэмжээн тухай мэдээсэл үгтэнэ.
2019 ондо Буряад Улас “Ерээдүй руу билет” гэһэн түсэлэй дүршүүлгын бүхы хэмжээ ябуулгануудта хабаадаха арга боломжотой можо нютагуудай тоодо оролсоо. Тиигэжэ уласаймнай һурагшад мэргэжэлнүүдтэй дүтэ танилсаха, дүршэл ехэтэй һурган хүмүүжүүлэгшэдэй хүтэлбэри доро өөһэдыгөө туршаха болоно. Бүхы можо нютагуудай дүн хамта 100 мянга гаран һурагшад ерээдүйнгөө мэргэжэлдэ бэлэдхэгдэхэ юм.
Буряадта энэ түсэл Буряадай Болбосоролой ба эрдэм ухаанай яаманай Байгалай аяншалгын колледж хүтэлбэрилнэ.
Буряад Уласай Болбосоролой ба эрдэм ухаанай яаманай мэдээсэлэй албанай гэрэл зураг
