627
Буряад Уласай Засагай газарта наранай элшын зайн галаар хүдөө ажахы эрхилэгшэдые хангаха талаар программа байгуулаа.
Программын хэмжээндэ наранай элшын зайн галаар хангаха тоног хэрэгсэлнүүдые худалдан абалгада тэдхэмжэ үзүүлэгдэхэ. Тусхай тоног хэрэгсэлэй сэнгэй 95% тэдхэмжээр түлэгдэхэ, тиихэдэ эндэ налог татабари ороногүй. Үлэһэн 5 % фермернүүд өөһэдөө түлэхэ. Уласаймнай 24 фермер наранай элшын зайн галай түхеэрэмжэтэй болохо тухай хэлсээ баталаад байна.
Буряадаймнай аймагуудта зайн галай һужааһаа холо оршодог хүдөө ажахынууд 5-һаа 15 кВт хүрэтэр наранай элшын станцинуудай зайн галтай болохо юм. «Хевел» компанинуудай бүлэгтэ ородог «Хевел Энергосервис» техническэ шиидхэбэри байгуулаа.
Энээнһээ урид Бэшүүр аймагай Билютай нютаг шадарай фермерскэ ажахыда иимэ түхеэрэмжэ туршалга гаража, ашаг үрэтэй байһаниинь тэмдэглэлтэй.
Хүдөө ажахы эрхилэгшэ Тулкимбек Эрматов арбаад жэлһээ дээшэ хүдөө ажахы эрхилжэ, адуу, мал, хони, ямаа шубуудые үсхэбэрилдэг. Тэрэнэй хонидынь 2500 толгой шахуу.
- Арбан жэлэй туршада бидэ зайн галгүй байгаабди. Бензинээр хүдэлдэг генератор ашаглахадаа, хамагаа алмаха гэжэ оролдохош. Ганса үдэшэ үглөө зайн гал аһаахаш. Мүнөө энэ түхеэрэмжын ашаар, зайн галай элшэ хүсэн бүхэли үдэртэ хүрэнэ. Наратай үдэрнүүдэй байхада, бензинэй генератор хүдэлгөөшьегүйбди, - гэжэ Тулкимбек Эрматов хөөрэнэ.
Наранай элшын-дизелиин зайн галай түхеэрэмжэ 6 модультай, 9,6 кВт*ч аккумулятортай, түхэреэн жэлдэ ашаглаха гэжэ дулаалагдаһан контейнертэй, тодхохо тоног хэрэгсэлнүүдтэй.
«Түрүүшын түхеэрэмжэ туршаһанай удаа, ашаг үрэтэй тоног хэрэгсэл олоор гаргаха шухала гэжэ ойлгообди. Фермернүүдэй зайн галай гаргаша бага болохо ха юм. Уласай Засагай газартай хамта иимэ түсэлнүүдтэ мүнгэ һомололгын асуудал шиидхэгдээ», - гэжэ «Хевел» компанинуудай бүлэгэй зюрэнхы захирал Игорь Шахрай тэмдэглэбэ.
