894
Үнгэрэгшэ зун Буряад улааста хура бороотой байжа, уһанда абтаха ушарнууд үзэгдөө. Тэдэнэй хойшолонгуудые усадхаха талаар ажалнууд улас дотор түгэсэбэ.
Буряад Уласай Захаамин, Загарай, Ивалга, Зэдэ, Хяагта, Сэлэнгэ, Тарбагатай аймагуудай 15 һууринда болон Улаан-Үдэ хотодо 915 гэрнүүд, гэрнүүд шадархи 240 участогууд зунай сагта үерһөө хохидоо гэжэ онсо байдалай талаар уласай агентство мэдээсэнэ. Тиигэжэ Буряад Уласай Засагай газарай нөөсын жасаһаа Зэдэ, Загарай аймагай үерһөө хохидоһон 612 ажаһуугшадта 6,12 сая түхэригэй нэгэ доро түлэгдэхэ тэдхэмжэ үзүүлэгдээ.
Тиихэдэ уласай болон аймагуудай уһанда абтаһан харгынууд заһабарилагдаа. Захаамин аймагта харгынууд сэбэрлэгдэжэ, мэдээсэлэй тэмдэгүүд табигдажа, даамба бүхэлэгдөө. Загарай аймагта 2 модо утатай Дабаата голой эрье бүхэлэгдэһэн байна. Тэрэшэлэн инфекционно үбшэнэй һүжэрхэгүйень һэргылжэ, 80 хүндэ тарилга хэгдээ. Ивалга аймагта Степная горхоной эрье баһал бүхэлэгдэжэ, аймагай бюджетһээ хохидоһон зондо нэгэ доро түлэгдэхэ мүнгэн туһаламжа үзүүлэгдээ. Зэдэ, Хурамхаан, Аха аймагуудта автомобильнуудай харгыда заһабарилга хэгдээ. Хойто Байгалай аймагта Холодной нютагта даамба заһабарилагдаа. Тиихэдэ Сэлэнгэ, Тарбагатай аймагуудта үерэй хойшолон усадхаха талаар заһабарилгын ажалнууд хэгдээ.
Уһанда абтаха ушарнуудые Буряад Уласай Толгойлогшо хинажа байгаа гээд тэмдэглэлтэй.
