920
Үнгэрһэн амаралтын үдэртэ Алас Дурнын тэдхэмжээр бэелүүлһэн ажалай түрүүшын жэлэй дүнгүүд согсолхо талаар олониитын зүбшэн хэлсэлгэ үнгэргэгдөө. Ородой Холбоото Уласай Юрэнхылэгшэ Владимир Путинай тодорхойлһон Алас Дурна зүгые хүгжөөхэ талаар түсэб болбол XXI-дэхи зуун жэлэй түрүү ээлжээнэй тоодо оруулагданхай.
Энэ хэмжээ ябуулгада ниитын ажал ябуулагшад, ехэ заһабари гү, али һэльбэн шэнэдхэгдэһэн эмхи зургаануудай хүтэлбэрилэгшэд, аймагуудай засаг дарганар мэдээсэлэй албанай түлөөлэгшэд суглараа.
- Гараха жэл, 2021 ондо юун болохоб, бидэ юу хараада абахабди гэжэ бидэ мүнөө хөөрэнэ бэшэбди. Бодото дээрээ хэгдэһэн ажалай дүүнгүүдээр хөөрэлдэнэбди. Тиигэжэ элүүрые хамгаалгын, болбосоролой, ниигэмэй, спортын һалбаринуудта, гэр байрын ажахыда - эдэ бүхы шэглэлнүүдээр нилээдгүй урагшаа дабшаабди. Буряад Уласые түрүү хүгжэлтын газар дэбисхэр гэжэ Юрэнхылэгшын тодорхойлһониие хараада абан, ямар туйлалтанууд хэгдээб гэжэ уласай бүхы ажаһуугшад нюдөөрөө хаража, ойлгохые би хүсэнэб, - гээд Алексей Цыденов хэмжээ ябуулга эхилээ.
Алас Дурнын тэдхэмжэ нэгэ доро хоёр зорилго бэелүүлгэдэ шэглүүлэгдэнэ: эдэй засагай ургалтын түрүү хүгжэлтын түбүүдые – ажалай һууринуудтые олошоруулха шэнэ үйлэдбэринүүдые байгуулга, байһаниие хүгжөөлгэдэ. Болон хүн зоной ажабайдал һайжаруулха ба ниигэмэй асуудалнуудые – элүүрые хамгаалгын, болбосоролой, соёлой, спортын объектнүүдые ба зондо хэрэгтэй һалбаринуудые барилга, ехэ заһабари хэлгэ ба шэнэдхэлгэ болоно.
Ургалтын түбүүдтэ 353,6 миллиард түхэригэй хүрэнгэ оруулалгын 31 түсэлнүүдые эхилхээр түсэблэгдэнэ. Мүнөө Буряад Уласай эдэй засагай ургалтын ниигэмэй хүгжэлтын түбүүдэй түсэбтэ 6,8 миллиард түхэригэй 99 хэмжээ ябуулганууд оруулагдана. 2019 оной дүүрэтэр юрэнхыдөө тэдэнэй 81-ниинь бэелүүлгэдэхэ гү, али дүүргэгдэхэ болоно.
- Һургуулинууд, эмнэлгын, соёлой байшанууд, техникумууд, спортивна объектнүүдые барилгада, һэльбэн шэнэлэлгэдэ, ехэ заһабарилгада, тоног түхеэрэмжэнүүдые шэнэлэлгэдэ мүнгэн хараалагдаа. Алас Дурнын тэдхэмжэ - эдэй засагай ургалта ба ниигэмэй шухала асуудалнуудые шиидхэхын тула хүсэтэй механизм боложо үгэнэ, - гэжэ уласай Засагай газарай эдэй засагай хүгжэлтын талаар түрүүлэгшын орлогшо Алексей Мишенин мэдүүлээ.
Буряад Уласай яамануудай хүтэлбэрилэгшэд энэ жэлдэ хэгдэһэн ба жэлэй дүүрэтэр бэелүүлэгдэхэ хэмжээ ябуулганууд тухай элидхэлнүүдые бэлдээ. Элүүрые хамгаалгын найман объект худалдан абтаа, заһабарилагдаа гү, али баригдаа. Уласай аймаг бүхэндэ эмнэлгын 31 эмхинүүдтэ мүнөө сагай эмнэлгын тоног түхеэрэмжэнүүд абтаа. Долоон сэсэрлиг, 18 һургуулинууд, нэмэлтэ болбосоролой гурбан эмхи зургаан болон мэргэжэлэй гурбан байгуулганууд заһабарилагдаа, 16 техникумүүд болон колледжнууд шэнэ тоног түхеэрэмжэнүүдые ба техникэ абаа. Гурбан соёлой байшан баригдажа, ашаглалда тушаагдаа, соёлой зургаан эмхи зургаанууд заһабарилагдаа. Набтар богоһотой 15 шэнэ трамвайнууд худалдан абтаа ба Улаан-Үдэдэ 2 км трамвайн зам шэнэлэгдээ.
Спортын һалбарида Онохой һууринда спортын гиирь үргэлгын түб нээгдээ, Хэжэнгэ һууринда спортын универсал согсолбори баригдаа, Шэбэртэ һууринда ГТО-гой түхеэрэмжэ тодхогдоо, Сэлэнгын залуушуулай байрада заһабарилга хэгдээ ба Улаан-Үдэдэ “Золотой дракон” гэһэн спортын һургуулиин һэльбэн шэнэлэлгэ дүүргэгдэжэ байна. Ниигэмэй талаһаа дэмжэлгын талаар эрхэ түлөөлэлгэнүүдые дүүргэхын тула “Шанс” гэһэн ниигэмэй дадалгын уласай түбтэ байра худалдан абтаа ба Уласай ветерануудай госпитальда шэнэ рентгенаппарат табигдаа.
Буряад Уласай Засагай газарай мэдээсэлэй албанай гэрэл зураг
