​Арад зондо аша туһатай хуулинууд

Буряад Уласай Арадай Хуралай 23-дахи сесси апрелиин 27-до зарлагдаһан байгаа. Сессиин үедэ депутадууд 42 асуудал зүбшэжэ үрдибэ. Мүнгэеэ түлэжэ, гэр барюулжа байтараа мэхэлүүлһэн зоной бэрхэшээлнүүд, ноёд ябаһанаа наһанайнгаа амаралтада гарагшадай нэмэлтэ мүнгэн тухай асуудал, Буряад Уласай Толгойлогшын тушаалдаа орохо ёһо хүрэтэрөө эгээл энэ сессиин үедэ халуунаар зүбшэн хэлсэгдээ. 

Хуудам талануудаа эзэтэй болгоё! 

Газар тухай асуудал хадаа хододоо арсалдаатай байдаг гээшэ ааб даа. Буряад Уласай Арадай Хуралай һунгамалнууд энэ удаашье һанаа амар һуубагүй: 3-һаа эхилээд, 20 хүрэтэр гектар газар түлөөһэгүйгөөр олзын хэрэг эрхилэгшэб гэжэ дансалагдаһан малшад, таряашадта хубааха тухай асуудал хурсаар табигдаба. Хүдөөдэ түбхинэжэ хүдэлдэг зондо энэ хуули тон хэрэгтэй. Мүнөө дээрээ юрэ зэнхыжэ байһан тала эзэтэй болохо ха юм. Хубаагдаха газар арайл бага байна гэжэ арадай һунгамалнуудай нэгэ зариман голоно. Тиихэдэнь нүгөөдүүлынь энэ бэрхэшээлые тад ондоогоор шиидхэхээр гэжэ бодомжолно. 

- Буряад Уласта үйлэдбэрилэгдэдэг эдеэ хоолой 80 хубинь хүдөөдэ бэлдэгдэнэ, - гэжэ Буряад Уласай Арадай Хуралай Газарай асуудалнуудай, аграрна бодолгын болон эд хэрэглэлгын дэлгүүрэй талаар хорооной түрүүлэгшэ Александр Попов һануулба. – Малшад, таряашадай ажахынуудтай тон адли хорёо соогоо хартаабха, үгэрсэ, помидор, морхооб гэхэ мэтые таридаг айлнууд, үхэр, хони, ямаа, гахай, адуу баридаг гэр бүлэнүүд хубитаяа оруулна. 

- Харыт. Мүнөө хэды шэнээн газар эзэгүй байна гээшэб? Тэндэ таряаншье таригданагүй. Бидэ тэрэ газар хэндэшье хубаахаяа һананагүйбди. Энэ буруу! – гэжэ Буряад Уласай Арадай Хуралай һунгамал Сергей Мезенин һанамжаяа элирхэйлбэ. 

Халуун арсалдаан эсэслэхэдээ, дурадхагдаһан хуулиин хэмжээн соо баталагдаба. 

Вертолёдуудай буудал – Улаан-Үдэдэ 

Буряад Уласай мүнөө жэлэй бюджедтэ хубилалтанууд оруулагдаба. Тиин тэрэнэй гаргашанууд 340 сая түхэригөөр ехэ болохо. Санитарна авиациин вертолёдуудай бууха газар Улаан-Үдэдэ түхеэрэгдэхэ. Захаамин аймагай Закаменск хотодо шэнэ котельнэ баригдаха. Сэлэнгэ аймагай Гусиноозёрск хотодо эмнэлгын байшан заһабарилагдаха. Энэл аймагай Селенгинск һууринда Соёлой байшан шэнэлэгдэхэ. 

- Хүдөө ажахы байгуулаад, нютаг дээрээ хүдэлхэ гэжэ шиидэһэн залуушуулые дэмжэхын тула 60 сая түхэриг һомолбобди. 2017 ондо бюджедһээ энэ хэрэгтэ гушаад шахуу сая түхэриг зорюулагдаhан байгаа. Бидэ дээрэһээнь үшөө 60 сая түхэригэй туһаламжа нэмэбэбди. Энэмнай тон шухала, - гэжэ Буряад Уласай Арадай Хуралай Бюджедэй, налогуудай болон сан жасын талаар хорооной түрүүлэгшэ Зоригто Цыбикмитов тайлбарилжа үгэбэ. 

Толгойлогшын тангариг тухай 

Буряад Уласай Толгойлогшоор һунгагдаһан хүн хэнэй урда шахаа тангариг бариха болоноб гэһэн асуудал гараба. 

- Шэнээр һунгагдаһан Буряад Уласай Толгойлогшо шахаа тангариг үгэхэдөө, шүүгшэдэй, прокурорнуудай, Буряад Уласай Арадай Хуралай һунгамалнуудай урда гараха ёhотой. Үшөө тиихэдэ аймагуудай захиргаануудай дарганарые, депутадуудай зүблэлэй түрүүлэгшэнүүдые урихабди. Тиигэжэ энэ ёhолол бүтэхэ зэргэтэй, - гэжэ Буряад Уласай Арадай Хуралай Гүрэнэй байгуулалтын, нютагай өөһэдын хүтэлбэриин, хуули ёһоной болон гүрэнэй албанай асуудалнуудай талаар хорооной түрүүлэгшэ Борис Ботоев хөөрэбэ. 

Багшанарай салин бага 

Буряад Уласай Засагай газарта үгтэдэг сагай хэмжээндэ Болбосоролой болон эрдэм ухаанай яаманай сайдай уялга гүйсэдхэгшэ Баяр Жалсановай элидхэл депутадууд анхаралтайгаар сонособо. Буряад Уласай дунда һургуулинуудта эрдэм ном заадаг багшанарай салин юунһээ бүридэнэб гэжэ Баяр Баторович тодорхойгоор хөөрэбэ. Салин хүлhэн һурагшадай тооhоо дулдыдадаг гэжэ багшалдаг зон һайса мэдэдэг болонхой. Иимэ гуримаар хүдэлхэ гээшэ буруу гэжэ Буряад Уласай Арадай Хуралай һунгамалнууд мэдүүлбэ. Багшын салин бүрилдүүлгые хубилгаха хэрэгтэй гэжэ депутадууд захиба. Үсөөн һурагшадтай һургуулинуудта 92 сая түхэриг һомололтой. Энэ асуудалые ерэхэ сессидэ зүбшэхэбди гэжэ депутадууд хэлсэбэд.