610
Улаан-Үдэдэ Ородой Холбоото Уласай Федерациин Зүблэлэй Ниигэмэй бодолгын талаар хорооной бэеын тамир болон спортын мэргэжэлтэ шүүбэриин зүблэлэй нүүдэл суглаан үнгэргэгдэбэ.
Суглаанай үедэ ажаһуугшадай элүүр энхэ ябаха, бэеэ һорихо оршон байдал байгуулха тухай зүбшэн хэлсэбэ. Буряад Уласта спорт хүгжөөлгэдэ ТОСуууд болон гүрэнэй-хубиин суг ажал ябуулга туһатай байха гэжэ мэргэжэлтэд шиидэбэ.
Мүнөө үедэ спортын һалбарида гүрэнэй бюджедһээ мүнгэн һомологдодог. Тиимэһээ мүнгэнэй бага ушарһаа гүрэнэй-хубиин суг хамта ажал ябуулга аша үрэтэй байха гэжэ мэргэжэлтэ шүүбэриин зүблэлэй түрүүлэгшэ Константин Вырупаев хэлэбэ. Энэ арга хэрэглэбэл спортын программа бэелүүлгэдэ гүрэнэй мүнгэн багаар һомологдожо, спортын һалбарида ниигэмэй олзын хэрэг эрхилэлгэ хүгжэжэ, аймагай, уласай, гүрэн түрын бюджедтэ татабари ехэ болохо. Энээнһээ уламжалан, ажаһуугшад бэе һорихо, элүүржэхэ гэжэ мэргэжэлтэн хэлэбэ.
Тиигэбэшье спорт дэмжэхэ уялгаяа гүрэн түрэ орхихогүй. Буряад Уласай Толгологшын уялга дүүргэгшэ Алексей Цыденовэй хэлэһэнэй ёһоор, уласай Засагай Газар болон Арадай Хурал Олимпиин наадануудта илагшадта бүхы наһаарнь тэдхэмжэ үзүүлхэ тухай шиидхэбэри абаһан байна.
«Спортын һалбариин хүгжэлтэдэ, залуушуулай спортоор һонирхохо талаар үзүүлэгдэхэ дэмжэлгэ түлхисэ боложо үгэхэ», - гэжэ Алексей Цыденов тэмдэглэбэ.
«Буряад Уласта спортын хүгжэлтын жэшээ бии. ТОСууд барилдаанай гэрнүүдые барина. Тиихэдэ «Дворовый инструктор» гэһэн түсэл бэелүүлэгдэнэ. Эдэ түсэлнүүдтэ ехэ мүнгэн гаргашалагдаашьегүй һаа, тэдэнэр аша үрэтэй. Тамирай томо байшангуудые барижархёод, тэрэнээ яагаад хангаха тухай бодолгото болонобди. Энэ һая Ивалгын дасан бидэ хүрөөбди. Тэндэ Хамба-лама Дамба Аюшеев һонирхолтой жэшээ хэлэжэ үгөө. Бидэ томо дасан барижа яданагүйбди. Теэд тэрэниие баряад, дулаасуулха, гэрэлтүүлхэ, хангаха хэрэгтэй ха юм. Тиигэжэ байнхаар, жаа талмайтайш һаа, таатай зохид байбалнь дээрэ гэжэ тэрэ хэлэһэн байна. Бидэ баһал тамирай байшангуудые энэ ёһоор бодхоохо аргатайбди», - гэжэ хүнгэн атлетикээр Олимпиин наадануудай чемпион, Федерациин зүблэлэй Ниигэмэй бодолгын талаар хорооной гэшүүн Татьяна Лебедева хтэмдэглэбэ.
Суглаанда хабаадагшад Федерациин Зүблэлэй Ниигэмэй бодолгын талаар хороондо дурадхалнуудые оруулһан байна.
