Эрхүү хотоһоо 159 модо зайда, Баяндай аймагай Тургеневкэ һууринда 1909 онһоо буряадуудтай хаяа хадхажа, белорусууд ажаһуудаг. Суута драматург Александр Вампиловай бэшэһээр, белорусуудай байшан гэрнүүдэйнь уран гоёор шэмэглэгдэһэн сонхонууд “оршон тойронхиие нангин гайхалаар хараһаар...”
Байгал далай шадар үнэржэн ажаһууха заяатай ажалша бэрхэ белорусууд мүхөөгөө алдаагүй. Нютагай хизаар ороноо шэнжэлэлгын музей соо табяатай дүшэ, хадуур, гарай, хүлэй ээрүүлнүүд болон бэшэшье зэмсэгүүд тэдэнэй ажалша бэрхые гэршэлнэ.
- Зүблэлтэ засагай үедэ эндэхи колхознигууд баян ургаса хуряажа, бэрхэшүүлынь хари гүрэнүүдээр аяншалха путёвконуудаар урмашуулагдадаг һэн. Тэрэ үедөө саятан байгаал даа, ээлжээндэ бэшүүлжэ, авто-хүлэгүүдые абадаг байһан юм, - гэжэ музей эрхилэгшэ Валентина Гуревская хөөрэнэ.
- Соёлоймнай байшанда арадай “Варенички”, хүүгэдэй “Рушничок” бүлгэмүүд белорус арадай дуунуудые уянгатуулдаг, - гэжэ сомон дарга Виктор Синкевич омогорхоно. Эндэхи “Крывiчы” клубта белорус хэлэнэй факультатив үнгэргэгдэдэг.
Байгалда шудхадаг олон гол горхонуудые шэнжэлһэн Ян Черскиин нэрэмжэтэ Эрхүүгэй белорус соёлой эблэлэй түрүүлэгшэ Алёна Сипакова: «Ерэхэ зун Байгалай эрьедэ Бүхэдэлхэйн белорусуудай фестиваль үнгэргэхэ бэлэдхэл ябуулнабди», - гэжэ мэдээсэнэ.