​Академик алдартай эрдэмтэд

Бүгэдэ Буряад Уласай, үндэһэн арадаймнай үзүүр бэрхэ түлөөлэгшэд, имагтал манай омогорхол гэлсүүлдэг дээдэ гарай эрдэмтэд Арнольд Тулохонов Борис Базаров хоёр Ородой эрдэмүүдэй академиин бодото гэшүүд гэһэн нэрэ зэргэтэй боложо, академигүүдэй алдарта хүртэбэ.

Автор: Радна-Нима Базаров
Описание: Борис Базаров

Ородой эрдэмүүдэй академиин октябриин 28-да болоhон хамтын ехэ суглаан дээрэ иимэ үндэр нэрэ зэргэнүүд манай уласай ялас гэмэ эрдэмтэдтэ олгогдоһон байха юм. Буряадай эрдэмэй түбтэ олон жэлэй туршада аша үрэтэйгөөр хүдэлжэ байдаг мэдээжэ энэ хоёр эрдэмтэн олон орёо дабаануудые дабажа, эрдэмтэдэй дунда манлай болохо эгээл ехэ нэрэ зэргэдэ хүртэбэ гээшэ.

Ородой эрдэмүүдэй академиин бодото гэшүүн гү, али академик гэһэн эрдэмтэ нэрэ зэргэ хүндэ нэгэ дахин олгогдоод, амиды ябаһан сагтань болюулагдадаггүй. Манай гүрэндэ, мүнөөдэрэй байдалаар, хамта дээрээ 940 академик бии.

Географиин эрдэмэй доктор, Ородой эрдэмүүдэй академиин гэшүүн-корреспондент, мүнөө дээрээ Ородой Холбооной Федеральна Суглаанай Федерациин Зүблэлэй гэшүүн Арнольд Тулохоновые, тиихэдэ Ородой эрдэмүүдэй академиин Сибириин таhагай Монгол арадууд, Буддын шажан болон Түбэд орониие шэнжэлэлгын хүреэлэнэй (институдай) дарга, түүхын эрдэмэй доктор, мүнөө Буряадай эрдэмэй түбэй президиумые толгойлжо байдаг Борис Базаровые академик гэhэн үндэр ехэ зиндаатай болоhон ушараарнь дэлхэйн бүхы буланһаа тэдэниие мэдэхэ, таниха, сугтаа хүдэлжэ, эрдэмэй талаар харилсажа байһан нүхэдынь, шабинарынь амаршалжа байнхай. Бүгэдэ буряад арадай түүхэтэ үндэһэн хэблэл гэжэ алдаршаһан “Буряад үнэн” сониной, нэгэ нэрэтэ хэблэлэй байшанай зохёохы хүдэлмэрилэгшэдэй зүгһөө бидэшье суута эрдэмтэдээ хани халуунаар амаршалнабди.